Së paku 17 të vrarë, përfshirë fëmijë, nga një sulm rus në lindje të Ukrainës

Së paku 17 njerëz, në mesin e tyre edhe fëmijë, janë vrarë të mërkurën nga një sulm rus me raketa në lindje të Ukrainës.

Presidenti i Ukrainës, Volodymyr Zelensky, e dënoi sulmin e 6 shtatorit, duke thënë se viktimat ishin njerëz “të cilët nuk kanë bërë asgjë keq”.

Zelensky tha në Telegram se një treg, dyqane dhe një farmaci u goditën në qytetin lindor, Kostiantinivka, pranë fushëbetejës.

Pasojat e sulmit rus me raketa në qytetin lindor të Ukrainës, Kostiantinivka, ku mbetën të vdekur së paku 16 persona, më 6 shtator 2023.

Sulmi ndodhi në ditën e vizitës së sekretarit të Shtetit të Shteteve të Bashkuara, Antony Blinken, në Kiev.

“Kjo Rusi e ligë duhet të mposhtet sa më shpejt që të jetë e mundur”, tha Zelensky.

Ministri i Brendshëm i Ukrainës, Ihor Klymenko, tha se 17 njerëz u vranë dhe 32 të tjerë u plagosën, duke shtuar se operacionet e kërkimit kanë përfunduar.

Ky sulm u dënua nga Bashkimi Evropian, i cili e cilësoi atë si “sulm barbar që i terrorizoi popullatën civile në Ukrainë”.

“BE-ja i dënon fuqishëm këto sulme kundër civilëve dhe infrastrukturës civile dhe i bën thirrje Rusisë ta ndalojë menjëherë agresionin çnjerëzor dhe të jashtëligjshëm”, tha një zëdhënës i Bashkimit Evropian.

Njëzet dyqane, linja të rrymës, një ndërtesë administrative dhe një kat i një ndërtese banimi u dëmtuan, sipas zyrës së prokurorit të përgjithshëm.

Ekipet e shpëtimit janë duke punuar për ta shuar zjarrin i cili i dëmtoi së paku 30 tenda të tregut të hapur, si dhe janë duke shikuar nën rrënoja për ndonjë civilë të ngecur.

Blinkeni po e viziton Kievin me synim për ta ndihmuar kundërofensivën tremujore të Ukrainës.

SHIKONI EDHE: Mes sulmeve ruse, Blinken viziton Kievin

Ai la të kuptohej se SHBA-ja do të vazhdojë ta përkrahë Ukrainën, edhe pse disa aleatë perëndimorë kanë shprehur shqetësimet e tyre për përparimin e ngadalshëm të Kievit në dëbimin e forcave ruse nga territori i saj kur janë bërë 18 muaj qëkur Rusia e nisi pushtimin, sipas zyrtarëve amerikanë,

“Ne duam të sigurohemi se Ukraina ka çfarë i nevojitet, jo vetëm për të arritur sukses në kundërofensivën e saj, por çfarëdo që i nevojitet për kohë të gjatë, për t’u siguruar se ka mbrojtje të fortë”, tha Blinken.