Presindeti i Shteteve të Bashkuara, Donald Trump ka minimizuar seriozitetin dhe ndikimin e sulmit kibernetik, që kishte për cak një sërë institucionesh të Qeverisë amerikane.
Trump po ashtu ka thënë se Kina mund të qëndrojë prapa këtij sulmi, e jo Rusia, siç kanë thënë një sërë zyrtrësh amerikanë, përfshirë edhe Sekretarin amerikan i Shtetit, Mike Pompeo.
“Sulmi kibernetik është më i madh në ‘Mediat e rreme’ sesa është në realitet”, shkroi Trump në Twitter më 19 dhjetor.
“Rusia, Rusia, Rusia, Rusia, është brohoritja kryesore kur ndodh diçka sepse mediat, kryesisht për arsye financiare, kanë frikë që ta diskutojnë mundësinë se (prapa sulmit kibernetik) mund të jetë Kina (mund të jetë)”, ka shtuar presidenti amerikan.
Pompeo: Rusia përgjegjëse për sulmin kibernetik
Sekretari amerikan i Shtetit, Mike Pompeo më 18 dhjetor tha se është e qartë se Rusia qëndron prapa sulmeve ndaj disa agjencive qeveritare amerikane, që gjithashtu kishin në shënjestër disa caqe komerciale në mbarë botën.
“Ka pasur një përpjekje të madhe për të përdorur pjesë të souftverit të palës së tretë për të ndërhyrë në sistemet e Qeverisë amerikane”, tha Pompeo për The Mark Levin Show më 18 dhjetor.
“Kjo ishte një përpjekje e konsiderueshme dhe mendoj se tani mund ta themi qartë se rusët ishin të përfshirë në këto aktivitete”, shtoi ai.
Kompania Microsoft tha se është njoftuar nga më shumë se 40 konsumatorë që u goditën nga ky sulm, që sipas ekspertëve mund të lejojnë sulmuesit që të kenë qasje në informacione të ndjeshme të qeverisë dhe në rrjete që operojnë infrastrukturë të tillë, siç janë rrjetet e energjisë elektrike.
Pothuajse 80 për qind e konsumatorëve të prekur janë me seli në Shtetet e Bashkuara, tha presidenti i Microsoft, Brad Smith në një shkrim. Kompanitë e tjera të tjera të prekura nga ky sulm kibernetik janë në Belgjikë, Britani, Kanada, Izrael, Meksikë, Spanjë dhe në Emiratet e Bashkuara Arabe.
“Ky nuk është ‘spiunim’ si zakonisht, edhe për kohën moderne. Por, prezanton një akt të pamaturisë që krijoi një cenueshmëri serioze teknologjike për Shtetet e Bashkuara dhe për botën”, tha Smith, duke shtuar se numri i viktimave të prekura nga ky sulm do të vazhdojë të rritet.
SHIKONI EDHE: Hakerët rusë dyshohen edhe për një tjetër sulm në SHBAJames Lewis, zëvendëspresident në Qendrën për Strategji dhe Studime Ndërkombëtare tha se sulmi mund të shndërrohet në sulmin më të rëndë që ka goditur Shtetet e Bashkuara, duke eklipsuar edhe sulm të dyshuar kinez që ndodhi më 2014.
“Shkalla (e sulmit) është tronditëse. Ne nuk e dimë se çfarë (informacioni) është marrë dhe kjo është tani punë e forenzikës”, tha Lewis, sipas agjencisë AFP.
Sulmi kibernetik fillimisht ishte raportuar më 13 dhjetor dhe mediat cituan zyrtarë amerikanë të thonë se hakerët në Rusi janë të dyshuar për këtë sulm.
Ambasada ruse në SHBA ka mohuar çdo përfshirje dhe përmes një deklarate për media më 14 dhjetor tha se Rusia “nuk kryen operacione sulmuese në fushën kibernetike”.
Departamenti për Siguri Kombëtare, Departamenti i Thesarit dhe ai i Tregtisë i SHBA-së ishin në mesin e të prekurve nga sulmi, raportuan mediat, të cilat cituan zyrtarë të paidentifikuar që kishin njohuri për këtë sulm kibernetik.
SHIKONI EDHE: SHBA paralajmëron për "rrezik të madh" nga sulmet kibernetikeMë 17 dhjetor, Departamenti amerikan i Energjisë, pranoi se është prekur nga sulmi kibernetik. Në këtë departament funksionon edhe agjencia që menaxhon me rezervat e armëve bërthamore të vendit.
FBI-ja dhe agjencitë e tjera janë duke kryer hetime për këtë sulm në SHBA, që goditi rrjetet kompjuterike të qeverisë dhe për hetimet, agjencitë ligjzbatuese kanë njoftuar edhe anëtarët e Kongresit.
Kompania, sofveri i së cilës është kompromentuar është SolarWinds. Kjo kompani, pranoi më 16 dhjetor se hakerët “nga një shtet tjetër” kanë futur një kod në rrjetin që menaxhon suflerin e tyre dhe kjo sipas tyre është bërë ndërmjet muajit mars dhe qershor të këtij viti.