Franca premtoi ndihmë ushtarake shtesë për Ukrainën të dielën, duke përfshirë tanke, automjete të blinduara, trajnime për ushtarët dhe ndihma të tjera, në kohën kur ushtria ukrainase po përgatitet për një kundërsulm ndaj forcave ruse.
Ky lajm u bë i ditur pas bisedimeve të paparalajmëruara në Paris ndërmjet dy liderëve.
Volodymyr Zelensky i Ukrainës dhe Emmanuel Macron i Francës zhvilluan një takim përreth tre orë në Pallatin presidencial francez Elysee - një takim që u mbajt i fshehtë deri pak para mbërritjes së liderit ukrainas në Paris nga Gjermania, me një avion të Qeverisë franceze.
Ndihma ushtarake për Ukrainën ishte një nga pikat kryesore të agjendës së takimit ndërmjet liderëve.
Zyra e Macronit tha se Franca do ta furnizojë Ukrainës me dhjetëra tanke të lehta dhe automjete të blinduara "në javët në vijim", pa dhënë numra specifikë. Gjithashtu, u premtuan më shumë sisteme të mbrojtjes ajrore, por përsëri detajet nuk u bënë publike.
Lexoni edhe këtë: Zelensky: Kievi nuk po sulmon territorin rusFranca synon të trajnojë rreth 2.000 ushtarë ukrainas në Francë këtë vit dhe gati 4.000 të tjerë në Poloni si pjesë e një përpjekjeje më të gjerë evropiane për t’i dhënë ndihmë Ukrainës, tha zyra e Macronit.
Në një deklaratë, Franca e përshkroi mbështetjen e saj për pavarësinë, sovranitetin dhe integritetin territorial të Ukrainës si "të palëkundur" dhe premtoi se ndihma e saj politike, ekonomike, humanitare dhe ushtarake do të vazhdojë "për aq kohë sa të jetë e nevojshme".
Në një postim në Twitter pas mbërritjes së tij, Zelensky tha: “Me çdo vizitë, aftësitë mbrojtëse dhe sulmuese të Ukrainës po zgjerohen. Lidhjet me Evropën po forcohen dhe presioni ndaj Rusisë po rritet”.
Franca e ka furnizuar Ukrainën me një sërë armatimesh, duke përfshirë sisteme të mbrojtjes ajrore, tanke të lehta, armë të tjera, pajisje dhe karburante.
Lexoni edhe këtë: Zelensky viziton RomënFranca dërgoi një aeroplan për të marrë Zelenskyn në Gjermani, ku ai u takua me kancelarin Olaf Scholz më herët të dielën dhe diskutoi kundërsulmin e planifikuar të vendit të tij. Zelensky tha se synon të çlirojë zonat e pushtuara nga Rusia brenda kufijve të njohur ndërkombëtarisht të Ukrainës dhe jo të sulmojë territorin rus.
“Ne nuk sulmojmë territorin rus, ne çlirojmë territorin tonë legjitim”, citohet të ketë thënë Zelensky pas disa raportimeve se ai ka konsideruar të sulmojë dhe pushtojë territore ruse, një lëvizje për të cilën është aluduar se ai mund ta përdorë si kartë për bisedime paqeje me Rusinë.
“Ne nuk kemi as kohë dhe as fuqi [për të sulmuar Rusinë]”, tha ai.
“Ne po përgatisim një kundërsulm për zonat e pushtuara ilegalisht, bazuar në kufijtë tanë legjitimë të përcaktuar me Kushtetutë, të cilët njihen ndërkombëtarisht”, deklaroi Zelensky.
Ndër zonat e pushtuara ende nga Rusia janë gadishulli i Krimesë dhe pjesë të Ukrainës lindore, me popullsi kryesisht rusishtfolëse.