Shoqata e Gastronomëve të Kosovës, përmes një njoftimi publik ka thënë të mërkurën se masat e prezantuara nga Qeveria e Kosovës do të dëmtojnë edhe më shumë ekonominë dhe sektorin e gastronomisë.

“Kundërshtojmë fuqishëm këto masa, pasi që në asnjë rast nuk u përmend nga qeveria se për këto mbyllje do të ketë mbështetje financiare në ekonomi”, është thënë në njoftim.

Pjesëtarët e kësaj shoqate kanë kërkuar nga Qeveria e Kosovës që sektori i gastronomisë të subvencionohet me një pako ekonomike në vlerë prej 10 milionë eurosh. Ata kërkojnë që brenda një afati shtatëditor të merren parasysh kërkesat e tyre.

SHIKONI EDHE: Rukiqi kërkon nga bizneset të respektojnë masat kundër koronavirusit, dënimet janë të mëdha

Kryeministri i Kosovës, Avdullah Hoti, ka prezantuar të mërkurën masat e reja për parandalimin e përhapjes së COVID-19.

Sipas Hotit këto masa do të hyjnë në fuqi të premten.

Masat e prezantuara nga kryeministri ndahen në tri zona të rrezikshmërisë, sipas numrit të të infektuarve nëpër komuna: zona e kuqe me rrezikshmëri të lartë, zona e portokalltë me rrezikshmëri mesatare dhe zona e gjelbër e cila ka rrezikshmërinë më të ulët.

Më 7 nëntor Shoqata e Gastronomëve të Kosovës ka protestuar duke kundërshtuar vendimin e qeverisë për mbyllje të bizneseve të tyre gjatë fundjavës.

Pjesëtarët e këtij sektori kanë zhvilluar një aktivitet simbolik, duke krijuar zhurmë me tenxhere dhe lugë.

Gastronomët protestojnë kundër masave anti-COVID

Përgjatë valës së parë të pandemisë së koronavirusit, bizneset në Kosovë janë ndihmuar me 60 milionë euro në kuadër të Fondit për Rimëkëmbje Ekonomike.