Lista Serbe: Radoiçiq, bartës i rezistencës në veri
Lista Serbe – partia më e madhe e serbëve të Kosovës – e ka dënuar vendimin e autoriteteve britanike për të sanksionuar zëvendës-presidentin e kësaj partie, Millan Radoiçiq, dhe e konsideruar atë “patriot të dëshmuar të rezistencës ndaj pushtimit të veriut të Kosovës” nga kryeministri i Kosovës, Albin Kurti.
“Për më shumë, këto veprime transparente dhe etiketime pa asnjë provë ndaj tij, prej të cilave përfiton Albin Kurti për të prezantuar veriun si vend krimi, shpërfaqin gjithë nervozimin e atyre që duan të gjunjëzojnë serbët për më shumë se dy dekada, për t’i asimiluar dhe dëbuar ata nga shtëpitë e tyre”.
Në vendimin e autoriteteve britanike është thënë se Milan Radoiçiq, biznesmen nga industria e ndërtimit, "ka përfituar nga përvetësimi i kontratave shtetërore dhe ka përdorur ndikimin e tij për t'u dhënë kontrata fitimprurëse kompanive të tij të ndërtimit".
Përveç Radoiçiqit, Britania ka sanksionuar edhe Zvonko Vesellinoviqin dhe Sllobodan Teshiqin.
Bërnabiq: Serbia synon të kërkojë kthimin e trupave në Kosovë
Kryeministrja e Serbisë, Ana Bërnabiq, deklaroi se Serbia synon të kërkojë kthimin e një numri të caktuar trupash në Kosovë.
Gjatë një deklarimi për media nga aeroporti “Nikolla Telsa” në Beograd, Bërnabiq tha se veprimet e homologut të saj kosovar, Albin Kurti, “na sollën në prag të konfliktit të armatosur”.
“Në këto rrethana, Serbia ka të drejtën dhe synimin, sipas rezolutës 1244, të kthejë një numër të caktuar trupash në Kosovë”, theksoi Bërnabiq.
Bërnabiq u bëri thirrje shteteve në botë që të respektojnë këtë të drejtë, që sipas saj buron nga Rezoluta 1244 e Këshillit të Sigurimit të Kombeve të Bashkuara.
Ajo tha se gjatë ditës, presidenti i Serbisë, Aleksandar Vuçiq, do të japë më shumë informacione lidhur me atë se si do të kërkohet kthimin e trupave në Kosovë, në bazë të kësaj rezolute.
Lajmin e plotë mund ta lexoni KËTU
Maliqi: Situata në veri, komplekse dhe me rreziqe potenciale
Situata në veri të Kosovës është komplekse dhe me shumë rreziqe potenciale, vlerëson Agon Maliqi, njohës i çështjeve politike në Kosovë.
“Dje kemi pasur një polic të plagosur dhe [situata] mund të shkojë drejt një përshkallëzimi më të madh, gjë që vërehet edhe me retorikën gjithnjë e më kërcënuese”, thotë ai për Radion Evropa e Lirë.
Sipas tij, për zgjidhjen e këtij problemi kërkohet një zgjidhje përfundimtare politike midis Kosovës dhe Serbisë. Pasi sipas tij, me këtë situatë, rrezikohet që veriu i Kosovës – i banuar me shumicë serbe – të kthehet në një zonë të krizës permanente apo të përshkallëzimit në një konflikt në nivele më të thella.
Më poshtë mund të dëgjoni bisedën me Agon Maliqin:
Presidenca në pritje të raportit të KQZ-së për zgjedhjet në veri
Presidentja e Kosovës, Vjosa Osmani, është në pritje të raportit nga Komisioni Qendror i Zgjedhjeve (KQZ), që më pas të marrë vendim që të shtyjë ose jo zgjedhjet në katër komunat në veri.
Kështu tha për Radion Evropa e Lirë, Bekim Kupina, këshilltar për media i presidentes Osmani.
Zgjedhjet për kryetarë të komunave në veri të Kosovës janë caktuar që të mbahen më 18 dhjetor.
Por, për shkak të incidenteve në veri, që kishin për cak edhe zyrat zgjedhore në Mitrovicë të Veriut dhe Zubin Potok, është nxitur debati nëse këto zgjedhje duhet të shtyhen.
Shtetet e Bashkuara dhe Gjermania kanë kërkuar nga Kosova që të shtyjë zgjedhjet lokale në veri.
