Trump triumfon në Ohajo
Presidenti amerikan, Donald Trump ka fituar në shtetin e Ohajos dhe 18 votat elektorale të tij.
Gara në mes të tij dhe Bidenit ishte ashpërsuar në muajt e fundit.
Kujtojmë se Trump ka fituar këtë shtet edhe katër vjet më parë.
Trump fiton në Ajoa dhe Montana
Agjencia e lajmeve, AP e ka shpallur presidentin aktual, Donald Trump fitues edhe në Ajoa dhe Montana.
I nominuari i republikanëve ka fituar gjashtë vota elektorale nga Ajoa dhe tri të tjera nga Montana.
Trump fiton në Florida
Presidenti amerikan, Donald Trump ka fituar edhe në një prej shteteve kyçe për rezultatin zgjedhor, Florida.
Ky vend i ka 29 vota elektorale.
Fitorja e Trumpit në këtë shtet nënkupton se rizgjedhja e tij është e mundshme.
Humbja e presidentit aktual në këtë shtet do ta bënte gati të pamundshme për Trumpin që të fitonte 270 votat që nevojiten për t’u kthyer në Shtëpinë e Bardhë.
Biden iu flet mbështetësve
Kandidati demokrat për presidenti Joe Biden ka thënë se e di që rezultatet zgjedhore mund të mos dihen deri në mëngjesin e së mërkurës apo edhe më gjatë.
Megjithatë, ai ka thënë se është optimist për rezultatin zgjedhor.
Sipas tij zgjedhjet nuk do të përfundojnë derisa të numërohet secila votë dhe se ai ndjehet mirë me rezultatin aktual.