Pjesëmarrja në zgjedhje pritet të jetë më e larta qysh në vitet 1950
Pjesëmarrja në zgjedhjet presidenciale në SHBA pritet të jetë rekorde.
Votuesit amerikanë janë duke zgjedhur midis Donald Trumpit, republikan, dhe Joe Bidenit, demokrat.
Mbi 100 milionë vetë kanë votuar me postë ose në vendvotimet që janë hapur para 3 nëntorit.
Michael McDonald, profesor në Universitetin e Floridës, i cili udhëheq Projektin Zgjedhor të SHBA-së, i ka thënë Radios Evropa e Lirë se pret që pjesëmarrja të jetë 67 për qind - më e larta qysh në vitet 1950.
McDonald ka thënë se do ta konsiderojë rezultatin në Florida si një “shenjë shumë të mirë” se si do të zhvillohen zgjedhjet.
Florida i ka 29 vota elektorale.
Për t’u zgjedhur president, një kandidati i duhen së paku 270 vota elektorale.
Numri i këtyre votave është i ndarë nëpër shtete varësisht madhësisë dhe numrit të banorëve që kanë.
Ka gjasa që rezultatin përfundimtar ta vendosin një numër shtetesh - në mesin e tyre: Arizona, Ajoa, Xhorxhia, Florida, Miçigeni, Karolina e Veriut, Pensilvania, Teksasi dhe Uiskonsini.
Nis mbyllja e disa vendvotimeve në SHBA
Dy shtetet e para amerikane, ku ka nisur mbyllja e vendvotimeve për zgjedhjet presidenciale, janë Indiana dhe Kentaki.
Indiana, prej nga vjen zëvendëspresidenti aktual, Mike Pence, është shteti i parë federal që i ka mbyllur vendvotimet në disa prej rretheve.
Indiana ka 11 vota elektorale, ndërsa Kentaki tetë.
Për të fituar zgjedhjet, njëri nga kandidatët – Donald Trump ose Joe Biden – duhet të sigurojë 270 vota elektorale.
AP: Trump fiton në Kentaki, Biden në Vermont
Presidenti amerikan, Donald Trump, ka fituar në shtetin e Kentakit, raporton AP.
Sfiduesi i tij demokrat, Joe Biden, ka fituar në Vermont.
Në Kentaki, Trump fiton tetë vota elektorale, ndërsa Biden në Vermont fiton tri vota elektorale.
Për t’u zgjedhur president, një kandidati i duhen së paku 270 vota të tilla.
Trump: Qëndrojmë shumë mirë
“Qëndrojmë shumë mirë në të gjithë vendin”, tha në një postim në Twitter presidenti amerikan, Donald Trump.
Trump është duke garuar në zgjedhjet presidenciale për mandatin e dytë, kundrejt sfiduesit të tij demokrat, Joe Biden.
Votimet në disa pjesë të SHBA-së janë duke vazhduar ende, ndërsa në disa shtete janë mbyllur.
Sipas agjencisë së lajmeve AP, Trump ka fituar tashmë Kentakin, ndërsa Biden Vermontin.