Nis kryerja e pagesave për skema pensionale dhe sociale
Ministria e Financave dhe Transfereve në Kosovë ka bërë të ditur se nga dita e mërkurë kanë filluar të kryhen pagesat për skemën pensionale derisa më 24 të këtij muaji do të kryhen pagesat për skemën e asistencës sociale.
Vendimi për kryerje të këtyre pagesave një javë më herët është marrë me qëllim të shmangies së radhëve të njerëzve, në kohën e përhapjes së koronavirusit të ri.
Autoritetet u kanë bërë thirrje kategorive të prekura nga ky vendim që të shfrytëzojnë bankomatet për tërheqje si dhe të kryejnë sa më shumë pagesa me kartela bankare.
Deri më tani në Kosovë janë konfirmuar 19 raste me koronavirus.
Shkon në 20 numri i të infektuarve me koronavirus në Kosovë
Instituti Kombëtar i Shëndetësisë Publike në Kosovë ka thënë se të mërkurën është konfirmuar edhe për një person të prekur me koronavirusin e ri.
“Rasti i konfirmuar është rast kontakti nga fshati Bradash-Podujevë, e gjinisë femër 55 vjeç”, është thënë në njoftimin e këtij Instituti.
Në njoftim është thënë edhe se deri më tani ky Institut ka kryer 308 teste të personave që dyshohet se janë prekur nga sëmundja COVID-19.
Me rastin e fundit, në Kosovë deri më tani është raportuar për 20 persona të infektuar me koronavirus.
Ministria e Shëndetësisë raporton "abuzuesit" e çmimeve të pajisjeve mjekësore
Zyrtarë të Ministrisë së Shëndetësisë kanë bërë të ditur se kanë furnizuar me pajisje mbrojtëse spitalet, klinikat dhe institucione tjera, përfshirë komunat, Policinë e Kosovës dhe zyrtarë doganorë, në kohën e përhapjes së koronavirusit të ri.
Naim Bardiqi, Sekretar i Përgjithshëm në këtë minisitri ka përmendur se pas tenderëve të shpallur për furnizim me këto pajisje është vërejtur rritje e çmimit të ofertave për 1,000 për qind.
Sipas tij, ministria ka njoftuar organet e hetuesisë për kompanitë që sipas tij kanë abuzuar me çmime.
“Të gjitha masat ndaj këtyre kompanive do të merren në bazë të ligjit për shëndetësi dhe kodit penal dhe do të sanksionohen që në situatë të emergjencës kombëtare kanë abuzuar me çmimet. Këto lloj keqpërdorime tejkalojnë kompetencat e inspektoratit shëndetësor apo farmaceutik”, ka thënë ai.
Bardiqi po ashtu ka njoftuar se pas pranimit të 400,000 mijë eurove nga Qeveria e Kosovës për sigurim të pajisjeve mbrojtëse, Ministria e Shëndetësisë ka nisur procedurën e blerjes së gjashtë llojeve të produkteve duke përfshirë: respiratorë të llojit FFP2, veshje mbrojtëse për tërë trupin, mburoja për fytyrë dhe pajisje tjera për një përdorim.
Ndërkohë është paralajmëruar që javën e ardhshme Kosova do të pranojë një kontigjent të furnizimeve në vlerë prej 7 milionë eurove nga Fondi i Kombeve të Bashkuara për Fëmijët (UNICEF).
Deri më tani në Kosovë është raportuar për 20 persona të prekur me koronavirusin e ri.
Radhët e gjata për miell...
Buka dhe produktet tjera të miellit janë të domosdoshme pothuajse për secilin prej nesh. Në kohën e përhapjes së koronavirusit të ri, një pjesë e popullsisë në Kosovë duket se ka dëshirë të ketë më shumë rezerva të këtij produkti në shtëpi. Shikojeni videon për më shumë hollësi.
