Franca mbyll hapësirat publike jo të domosdoshme
Kryeministri francez, Edouard Philippe ka urdhëruar mbylljen e hapësirave jo të dosmosdoshme publike nga mesnata, me qëllim të parandalimit të përhapjes së koronavirusit.
Kjo masë do të zbatohet për restorantet, kafiteritë, kinematë, klubet e natës dhe disa biznese tjera.
Philippe po ashtu i ka kërkuar popullatës franceze që të kufizojë udhëtimin nga qyteti në qytet.
Franca ka raportuar një rritje të dukshme të personave të infektuar me koronavirusin e ri të shtunën, nga 3,661 në 4,499.
Në këtë ditë, Franca ka raportuar edhe për 12 vdekje shtesë, duke e dërguar numrin e viktimave në 79.
Arrin në 18 numri i të infektuarve me koronavirus në Maqedoni të Veriut
Në Maqedoninë e Veriut janë regjistruar edhe gjashtë raste të reja me koronavirus, duke e çuar në 18 numrin e përgjithshëm të të prekurve sëmundja Covid-19.
Ministri i Shëndetësisë, Venko Filipce, i cili udhëheq grupin e krizës, ka thënë se të infektuarit janë persona të kthyer në vend nga shtetet me rrezik të lartë. Gjithsej ishin testuar 12 persona, gjashtë prej të cilëve kanë dalë me rezultate pozitive.
Detajet tjera i kuptoni këtu.
Pesë raste të reja me koronavirus në Serbi
Serbia ka njoftuar për pesë raste të reja me koronavirus, duke dërguar në 46 numrin e të prekurve me këtë sëmundje.
Sipas ministrit serb të Shëndetësisë, Zllatibor Lonçar, tre prej të prekurve janë lëshuar në shtëpi, derisa dy të tjerë janë në spital, por gjendja e tyre është stabile.
Mbi 21,000 të infektuar me koronavirus në Itali
Italia ka raportuar rritjen më të madhe të numrit të të infektuarve nga dita në ditë me koronavirusin e ri.
Autoritetet kombëtare të shëndetësisë u kanë thënë gazetarëve se kanë regjistruar 3,497 raste në 24 orët e fundit.
Kjo shifër nënkupton 20 për qind rritje të numrit të rasteve nga një ditë në tjetrën.
Pak më shumë se gjysma e këtyre rasteve janë raportuar në Lombardi, rajonin verior të Italisë, që është prekur më së keqi në Evropë nga ky virus.
Numri i të prekurve me këtë sëmundje në Itali ka arritur në 21,156.