Ushtria amerikane do të dërgojë 1,000 trupa shtesë në Lindjen e Mesme, për shkak të rritjes së tensioneve me Iranin.
Ushtruesi i detyrës së sekretarit amerikan të Mbrojtjes, Patrick Shanahan, tha se trupat shtesë janë përgjigje ndaj, siç u shpreh, “sjelljes armiqësore” të forcave iraniane.
Ushtria amerikane po ashtu shpërndau fotografi të reja, të cilat, sipas saj, e lidhin Iranin me sulmet e fundit mbi cisternat e naftës në Gjirin e Omanit.
Të hënën, Irani tha se nuk do të veprojë më në përputhje me disa pjesë të marrëveshjes së vitit 2015, e cila i ka frenuar ambiciet e tij bërthamore.
Ai tha se, brenda dhjetë ditësh, do të shkelë kufirin e përcaktuar me fuqitë ndërkombëtare, mbi rezervat e uraniumit të pasuruar.
Shanahan tha përmes një deklarate se “Shtetet e Bashkuara nuk duan konflikt me Iranin”, porse ndërmarrin veprime për t’i ofruar siguri dhe mirëqenie personelit ushtarak të SHBA-së, që punon në rajon, në mbrojtje të interesave kombëtare.
Ai tha se ushtria do të vazhdojë ta monitorojë situatën dhe ta rregullojë nivelin e trupave në përputhje me rrethanat.
Detaje se ku saktësisht do të vendosen forcat shtesë të SHBA-së nuk u dhanë.
Muajin e kaluar, presidenti amerikan, Donald Trump, ka njoftuar se do të dërgojë 1,500 trupa shtesë në Lindjen e Mesme.
Pak përpara njoftimit të ri, Pentagoni publikoi disa imazhe, të marra nga një helikopter i marinës së SHBA-së, që thuhet se tregojnë forcat iraniane duke larguar një minë të pashpërthyer nga një cisternë japoneze e naftës.
Sipas Uashingtonit, fotografitë tregojnë një përpjekje të forcave iraniane për të hequr provat nga vendi i ngjarjes.
Të enjten e kaluar, përveç cisternës japoneze u sulmua edhe një cisternë e Norvegjisë, por askush nga ekuipazhi nuk u plagos në incident.
Irani e mohoi çdo përfshirje, ndërsa akuzat amerikane i cilësoi si "të pabazuara".
Shtetet e Bashkuara po ashtu i akuzuan forcat e Gardës Revolucionare të Iranit për përpjekje për të goditur një avion amerikan, që po i monitoronte cisternat në kohën kur ndodhi sulmi.
Marrëdhëniet midis Shteteve të Bashkuara dhe Iranit janë të tensionuara qëkur presidenti i SHBA-së, Trump, në vitin 2018, u tërhoq në mënyrë të njëanshme nga marrëveshja ndërkombëtare që e kufizoi programin bërthamor të Iranit, në këmbim të lehtësimit të sanksioneve kundër tij.
