Nis evidentimi i dëmeve të shkaktuara nga vërshimet në Pejë

Komuna e Pejës ka nisur evidentimin e dëmeve të shkaktuara nga vërshimet e 24 qershorit, tha për Radion Evropa e Lirë kreu i kësaj komune, Gazmend Muhaxheri.

Nga vërshimet në Pejë kanë humbur jetën një fëmijë 5 vjeç dhe nëna e tij.

Reshjet e dendura të shiut po ashtu kanë shkaktuar dëme materiale në këtë komunë.
Dëme janë shkaktuar në ekonomitë familjare, biznese, bujqësi dhe infrastrukturë publike.

“Janë disa biznese, ekonomi familjare [që kanë pësuar dëme], një dyqan ushqimor është shkatërruar krejtësisht. Deri më tani janë evidentuar 26 vetura të dëmtuara të cilat i kemi hequr nga kanalet e ujërave të hapura. Numri mund të rritet”, tha Muhaxheri për REL-in.

• Arton Konushevci

Kështu është dukur të dielën qendra e Pejës, pas vërshimeve me të cilat është përballur një ditë më parë. Vërshimet kanë marrë jetën e dy personave në këtë qytet – një nëne me të birin e saj pesëvjeçar. Pjesëtarë të Forcës së Sigurisë së Kosovës janë angazhuar në përpjekjet për kërkim-shpëtim.

Sipas kryetarit të Pejës, komuna nuk ka kapacitete për kompensimin e dëmeve dhe zakonisht kompensimi bëhet nga niveli qendror.

Disa qytete të Kosovës u përballën me vërshime edhe në janar të këtij vitit. Përmbytje nga vërshimet kishte në komunën e Skenderajit, Mitrovicë të Jugut, Klinës dhe Istog.