Stoltenberg: Ky është moment i rëndë për sigurinë e Evropës
Shefi i NATO-s, Jens Stoltenberg, duke komentuar situatën në Ukrainë, ka thënë se ky është moment i rëndë për sigurinë në Evropë.
“Ne kemi një luftë në Evropë, të shkallës dhe llojit që kemi menduar se i përkiste historisë”.
Ai ka thënë se ka përfunduar një takim me zyrtarë të NATO-s dhe një listë të gjatë të shteteve që janë pajtuar për të mbajtur konsultime urgjente.
Stoltenberg ka thënë se sulmi “i pajustifikuar dhe i paprovokuar” ndaj Ukrainës është duke vënë në rrezik jetët e shumë njerëzve.
Sipas tij, Rusia ka nisur sulmet nga toka dhe ajri nga drejtime të ndryshme, duke shënjestruar infrastrukturën ushtarake dhe qendrat e qyteteve urbane të Ukrainës.
“Ky është një pushtim i qëllimshëm dhe gjakftohtë që është planifikuar gjatë”, ka thënë ai.
Stolteneberg ka thënë se liderët rusë do të mbahen përgjegjës për veprimet e tyre dhe jetët e humbura.
Lufta në Ukrainë – Çfarë duhet të dini?
- Ukraina gjendet në pjesën lindore të Evropës, ashtu sikurse Rusia.
- Është shteti i dytë më i madh në Evropë, ndërsa Rusia është shteti më i madh në botë.
- Ukraina ka një popullsi prej 44 milionë banorësh, ndërsa Rusia ka 144 milionë banorë.
- Presidenti rus, Vladimir Putin, ka thënë se qëllimi tij është çmilitarizimi i Ukrainës.
- Presidenti ukrainas, Volodymyr Zelensky, është zotuar se do të luftojë për lirinë e shtetit.
- Rusia ka marrë kontrollin e Gadishullit ukrainas të Krimesë më 2014.
- Prej atëherë, Ukraina është drejtuar nga institucionet evropiane dhe aleanca e Perëndimit NATO.
- Putin ka thënë se dëshiron të shmangë integrimin e Ukrainës në këtë aleancë.
Scholz: Kjo është lufta e Putinit
Kancelari gjerman, Olaf Scholz, e ka konsideruar sulmin rus në Ukrainë si luftë të presidentit rus, Vladimir Putin.
“Putin po sjell vuajtje dhe shkatërrim në fqinjët e tij, po shkel sovranitetin dhe kufijtë e Ukrainës… po kërcënon jetët e njerëzve të pafajshëm në Ukrainë. Ai po kërcënon rregullin paqësor në kontinentin tonë. Për këtë nuk ka arsyetim. Kjo është lufta e Putinit”.
Erdogan kundërshton sulmin rus
Presidenti turk, Recep Tayyip Erdogan, ka thënë se kundërshton operacionin ushtarak të Rusisë.
Ai e ka quajtur sulmin rus si “goditje të rëndë për paqen dhe stabilitetin rajonal”.
Ministria e Jashtme e Turqisë i ka bërë thirrje Federatës Ruse që menjëherë t’i japë fund “këtij akti të paligjshëm”.
