Lideri i Koresë së Veriut sërish paralajmëron për përdorimin e armëve bërthamore

Lideri i Koresë së Veriut, Kim Jong Un, ka përsëritur paralajmërimin se Phenjani mund të përdorë armët e tij bërthamore për qëllime “parandaluese” për t’iu kundërvënë forcave armiqësore, njoftoi të shtunën media shtetërore verikoreane.

Kim u tha zyrtarëve të lartë ushtarakë se “për të ruajtur epërsinë absolute” të forcave të armatosura të Koresë së Veriut, shteti duhet të jetë në gjendje të “parandalojë dhe frenojë të gjitha përpjekjet e rrezikshme dhe lëvizjet kërcënuese... nëse është e nevojshme”, raportoi agjencia e lajmeve KCNA.

Phenjani duhet të vazhdojë të ndërtojë arsenalin e tij në mënyrë që të mund të ketë “fuqi dërmuese ushtare në mënyrë që asnjë forcë në botë të mos mund ta provokojë”, tha Kim, duke thënë se “kjo do të garantojë sigurinë e vendit tonë”.

Koreja e Veriut ka testuar një mori raketash gjatë viteve të fundit, duke përfshirë disa që Shtetet e Bashkuara të Amerikës dhe Koreja e Jugut kanë vlerësuar se kanë qenë në kuadër të testimeve të sistemeve interkontinentale. Testimet janë parë po ashtu si përpjekje e Phenianit për të treguar se ka sisteme të besueshme raketore që mund të bartin koka bërthamore. Organizata e Kombeve të Bashkuara ia ndalon Koresë së Veriut testimin e raketave balistike dhe atyre bërthamore, prandaj edhe ka vendosur sanksione ndaj saj. Por, ky shtet i Azisë Lindore ka shkelur vazhdimisht ndalesën, ndërsa udhëheqësi koreanoverior, Kim Jong Un, është zotuar se do të rrisë kapacitetet shtetërore për mbrojtje. Shumica e pamjeve në këtë fotogaleri janë publikuar nga agjencia shtetërore koreanoveriore e lajmeve KCNA, dhe janë shpërndarë nga agjencia ndërkombëtare e lajmeve Reuters, e cila nuk ka mundur të verifikojë në mënyrë të pavarur datën e shkrepjes së fotografive. (Përgatiti: Trim Haliti)

Komente të ngjashme Kim kishte bërë gjatë një parade ushtarake më 25 prill, kur ai tha se mund të përdorë arsenalin bërthamor nëse kërcënohen “interesat thelbësore” të Koresë së Veriut.

Pavarësisht sanksioneve ndërkombëtare, Koreja e Veriut ka dyfishuar përpjekjet për modernizimin e ushtrisë dhe gjatë këtij viti ka testuar një sërë armësh të reja, teksa ka injoruar ofertat e Shteteve të Bashkuara për bisedime.

Muajin e kaluar, Koreja e Veriut ka testuar një raketë balistike ndërkontinentale. Ky ishte testimi i parë i një rakete të këtij lloji që prej vitit 2017 dhe sipas imazheve satelitore, është rritur aktiviteti në vendet ku kryhen testime bërthamore në Korenë e Veriut.