Pamje nga Zveçani, një ditë pas protestave të dhunshme
Kupchan: Qeveria të tërhiqet nga instalimi i kryetarëve në veri
Charles Kupchan, nga Këshilli amerikan për Marrëdhënie me Jashtë, thotë se Qeveria e Kosovës duhet të tërhiqet nga përpjekjet për instalimin e kryetarëve shqiptarë në komunat me shumicë serbe në veri të Kosovës.
Sipas tij, këto janë veprime që, në afat të gjatë, janë të padobishme dhe kundërproduktive.
“Mendoj se duhet të shohim që Qeveria e Serbisë dhe ajo e Kosovës ulen bashkë dhe përpiqen t’i përpunojnë detajet e marrëveshjes [për normalizimin e marrëdhënieve]. Vetëmenaxhimi për komunitetin serb duket të jetë një prej pengesave kryesore. Mendoj se ajo që po ndodh tani në veri, është një shpërqendrim nga ky hap i rëndësishëm i marrëveshjes”, thotë Kupchan në një intervistë dhënë Radios Evropa e Lirë.
Sipas tij, problemi i veriut të Kosovës mund të zgjidhet vetëm me një marrëveshje të gjerë midis Prishtinës dhe Beogradit.
Intervistën e plotë mund ta lexoni këtu.
Mbi 100 të tubuar në Leposaviq, Lista Serbe me kërkesa të njëjta
Korrespondentë e REL-it raportojnë për më shumë se 100 njerëz të tubuar para ndërtesës së Komunës së Leposaviqit.
Përfaqësues të Listës Serbe përsëritën kërkesat e një dite më parë, si kusht për shpërndarjen e protestuesve: tërheqjen e njësive speciale të Policisë së Kosovës dhe daljen e kryetarit të ri shqiptar nga ndërtesa e komunës.
Për sigurinë janë duke u kujdesur ushtarët e kontingjentit italian të KFOR-it.
KFOR: Kosova dhe Serbia të marrin përgjegjësi për ngjarjet në veri
Komandanti i KFOR-it, gjeneralmajor Angelo Michele Ristuccia, kërkoi nga Kosova dhe Serbia që të marrin “përgjegjësinë e plotë” për ngjarjet që ndodhën më 29 maj në veri të Kosovës dhe “të mos fshihen pas narrativëve të rremë”.
Ristuccia kërkoi nga palët, po ashtu, që të parandalojnë “çdo përshkallëzim të mëtejmë” të situatës.
Përmes një njoftimi për media, misioni paqeruajtës i NATO-s në Kosovë, KFOR, tha se gjatë ndërhyrjes në Zveçan të hënën, 30 ushtarë të këtij misioni u lënduan: 19 nga kontingjenti hungarez dhe 11 nga ai italian.
“Ata pësuan lëndime të shumta, përfshirë thyerje dhe djegie nga pajisjet e improvizuara shpërthyese dhe mjetet ndezëse”, thuhet në njoftim.
