Banorët e Vushtrrisë evakuohen për shkak të vërshimeve

Banorët e një pjese të Komunës së Vushtrrisë janë evakuuar, pasi lumi Sitnica ka dalë nga shtrati, duke shkaktuar vërshime, njoftoi kreu i kësaj komune, Xhafer Tahiri.

Tahiri tha se gjendja “është e rënduar” dhe se në evakuimin e banorëve ka ndihmuar edhe Forca e Sigurisë së Kosovës.

“Shkolla fillore 'Naim Frashëri' në qytet është duke u bërë gati për strehim për qytetarët që kanë nevojë”, tha Tahiri.

Kryeministri në detyrë i Kosovës, Avdullah Hoti tha se Qendra e Situatave e ka njoftuar se gjendja në komunat të cilat janë përballur me vërshime ditëve të fundit, pasojë e reshjeve të shumta të shiut dhe të borës, "është nën kontroll".

Në njoftimin e lëshuar nga Zyra e Hotit, thuhet se gjatë së martës është intervenuar në një lokacion në Fushë Kosovë dhe në dy lokacione në Komunën e Vushtrrisë.

• Radio Evropa e Lirë

Instituti Hidrometeorologjik i Kosovës ka thënë se situata meteorologjike pritet të stabilizohet në ditët në vijim. Kjo pasi ditët e fundit, për shkak të reshjeve të shiut dhe borës, disa pjesë të Kosovës u përballën me vërshime, që shkaktuan dëme të mëdha materiale në pronat private dhe ato publike.

Ndërkaq, Instituti Hidrometeorologjik i Kosovës ka thënë se situata meteorologjike pritet të stabilizohet në ditët në vijim.