Qeveria e Maqedonisë i ka dhënë dritën e gjelbër propozimit të ligjit për përdorimin e gjuhëve, i cili do të dërgohet në Parlamentin e Maqedonisë për t’u miratuar.
Ligji për gjuhët ishte pjesë e marrëveshjes ndërmjet partnerëve të koalicionit qeveritar, Lidhjes Social-Demokrate të Maqedonisë, Bashkimit Demokratik për Integrim dhe Aleancës për Shqiptarët.
“Me këtë ligj do të zgjerohet përdorimi zyrtar i gjuhës, të cilën e flasin së paku 20 për qind e popullatës, që do të thotë se me institucionet, qytetarët do të mund të komunikojnë në gjuhën e tyre amtare”, deklaroi kryeministri i Maqedonisë, Zoran Zaev.
Ai theksoi se ligji tashmë është dërguar në Parlament dhe pasi të miratohet në institucionin ligjvënës, Qeveria do ta dërgojë dhe në Komisionin e Venedikut.
Zaev deklaroi se ligji është në përputhje me Kushtetutën e Maqedonisë.
Ndërsa, zëvendëskryeministri për sistem politik, Hazbi Lika, tha se ligji i gjuhëve përmbush nevojat e të gjitha komuniteteve, pa e cenuar askënd, dhe shtoi se Qeveria e Maqedonisë me këtë ligj tregon se ka forcë për t’i shtyrë para proceset.
“Ky ligj tani kaloi në Qeveri dhe presim që Parlamenti i Republikës së Maqedonisë ta akceptojë këtë ligj. Presim që deputetët e Republikës së Maqedonisë të reflektojnë ndaj këtij ligji, sepse jemi përpjekur që në të gjitha aspektet t’i mbrojmë dokumentet kryesore të shtetit. Po ashtu, jemi përpjekur të gjejmë dhe mundësinë e realizimit të këtij ligji me qëllim që qytetarët e Republikës së Maqedonisë të mund t’i realizojnë nevojat e veta”, theksoi Lika
Në bazë të propozim-ligjit për përdorimin e gjuhëve në nenin një theksohet se “Në gjithë territorin e Republikës së Maqedonisë dhe në marrëdhëniet ndërkombëtare, gjuhë zyrtare është gjuha maqedonase dhe shkrimi i saj cirilik”.
Në ligjin e propozuar nga Qeveria, përdorimi zyrtar i gjuhës shqipe është kualifikuar me formulimin “gjuhën, të cilën e flasin mbi 20 për qind e popullatës”, duke e futur në kllapa fjalën gjuha shqipe.
“Gjuhë tjetër që e flasin më së paku 20 për qind e qytetarëve (gjuha shqipe), gjithashtu, është gjuhë zyrtare dhe shkrimi i saj, në pajtim me këtë ligj”, theksohet në draft-ligjin e bërë publik për mediet.
Ndërkaq, Zeqiria Ibrahimi, zyrta i lartë i Lëvizjes Besa, e cila parti është në opozitë, për Radion Evropa e Lirë tha se për ligjin që rregullon përdorimin e gjuhëve, nuk është konsultuar partia që përfaqëson, megjithëse se a do të marrë mbështetje ligji në fjalë nga pesë deputetët e kësaj partie, do të vendoset pasi ta kenë marrë dhe zyrtarisht tekstin e këtij ligji.
“Sipas informacioneve tona, shumica qeveritare vetëm e ka plotësuar ligjin për përdorimin e gjuhës që e flasin komunitetet jo shumicë. Pra, nuk do të kemi ligj të veçantë që e rregullon përdorimin e gjuhës shqipe. Ndërkaq, ne mendojmë se duhet të miratohet një ligj i veçantë vetëm për gjuhën shqipe, i cili nuk e ka për detyrë vetëm një avancim, qoftë të madh ose të vogël, por që synon ta rregullojë përdorimin e gjuhës shqipe sipas shembullit të maqedonishtes. Gjithsesi, nuk po paragjykojmë. Kur të na vijë propozimi, do ta shohim dhe do të vendosim se cili do të jetë vendimi ynë”, tha Ibrahimi.
Mirëpo, VMRO DPMNE-ja e drejtuar nga ish-kryeministri Nikolla Gruevski, tha se ligji është në kundërshtim me Kushtetutën e Maqedonisë dhe i njëjti nuk do të mbështetet nga kjo parti.
Ndryshe, në bazë të propozim-ligjit që ka marrë vizë nga qeveria e Maqedonisë, gjuha shqipe mund të përdoret “Në të gjitha organet të pushtetit qendror në Republikën e Maqedonisë, institucionet shtetërore, ndërmarrjet publike, drejtoritë, komisionet, personat juridik të cilët kryejnë autorizime publike në pajtim me ligjin dhe institucionet tjera”, theksohet në draft ligjin e gjuhëve.
Për atë se a do të marrë shtrirje gjuha shqipe në bankënota dhe uniformat e pjesëtarëve të Armatës së Maqedonisë, do të do të kërkohet vlerësim nga Komisioni i Venedikut.
Partnerët e koalicionit qeverisës në bazë të ligjit që ka marrë vizë nga Qeveria, kanë arritur ujdi që në bankënota të përdoren simbole kulti që do të reflektojnë edhe ato shqiptare.
Përderisa në uniformat e pjesëtarëve tëpolicisë, punonjësve të shëndetësisë dhe zjarrfikësve, gjuha shqipe do të figurojë vetëm në ato komuna ku së paku 20 për qind e popullatës e flasin gjuhën shqipe.
