Tri pikat e rendit të ditës
Në agjendën zyrtare të publikuar nga Kuvendi i Kosovës për seancën e sotme janë tri pika të rendit të ditës:
- 1. Formimi i Komisionit të përkohshëm për verifikimin e kuorumit dhe të mandateve të deputetëve,
- 2. Dhënia e betimit të deputetëve,
- 3. Zgjedhja e Kryetarit të Kuvendit dhe e nënkryetarëve të Kuvendit.
Delawie: Ditë e rëndësishme për formimin e Qeverisë
Ambasadori amerikan në Kosovë, Greg Delawie, thotë se dita e sotme është e rëndësishme për procesin e formimit të Qeverisë së Kosovës.
Ai thotë se shpreson që partitë politike të bëjnë “veprime pozitive për të ardhmen e Kosovës”.
“Sot është ditë e rëndësishme për procesin e formimit të Qeverisë. Shpresoj të shoh veprime pozitive për të ardhmen e Kosovës nga të gjitha partitë politike”, ka shkruar ambasadori amerikan në Twitter.
Grupet parlamentare në konsultime para seancës
Para fillimit të seancës konstituive, disa nga grupet parlamentare kanë zhvilluar konsultimet e nevojshme.
Grupet parlamentare, pritet të përfaqësohen me shefat e ri gjatë legjislaturës së gjashtë. Në këto takime, sipas paralajmërimeve, janë rikonfirmuar edhe qëndrimet e tyre në lidhje me pikën më të rëndësishme - zgjedhjen e kryetarit të Kuvendit.
Propozimin për të parin e Kuvendit , pritet ta japë koalicioni PAN (PDK, AAK dhe NISMA)
Procedura e zgjedhjes së kryetarit të Kuvendit
Në bazë të Kushtetutës së Kosovës parashihet që kryetarin e prezanton partia, subjekti politik apo koalicioni që ka fituar zgjedhjet parlamentare. Në këtë rast, kjo nënkupton që kryetarin mund ta propozoj vetëm koalicioni PAN (Partia Demokratike e Kosovës, Aleanca për Ardhmërinë e Kosovës dhe Nisma).
Sipas Kushtetutës: “Kryetari i Kuvendit zgjedhet me shumicën e votave të të gjithë deputetëve të Kuvendit”.
Kuvendi ka edhe pesë nënkryetarë, tre nga partitë e shumicës dhe dy nga komunitetet jo shumicë.
Facebook Forum