Raportet e tensionuara
Lëvizja Vetëvendosje, Aleanca për Ardhmërinë e Kosovës dhe Nisma për Kosovën, të trija në opozitë, janë zotuar se do ta pengojnë seancën e sotme në Kuvendin e Kosovës për zgjedhjen e Hashim Thaçit, kryetarit të Partisë Demokratike të Kosovës, në postin e presidentit të Republikës.
Opozita kundërshtimet i ka nisur që në muajin shtator të vitit 2015, duke kërkuar shfuqizimin e marrëveshjes për ngritjen e Asociacionit të komunave me shumicë serbe dhe atë për shenjimin e kufirit me Malin e Zi. Ajo ka përdorur edhe gazin lotsjellës në Kuvend për të penguar çdo seancë, duke thënë se marrëveshjet cenojnë tërësinë territoriale të Kosovës.
Pas interpretimit të Gjykatës Kushtetuese të Kosovës se disa pjesë të marrëveshjes për Asociacionin nuk janë në pajtim me Kushtetutën, opozita doli me kërkesën për dorëheqjen e plotë të qeverisë dhe mbajtjen e zgjedhjeve të parakohshme.
Marrëveshja është arritur në kuadrin e bisedimeve në Bruksel, ndërmjet Kosovës dhe Serbisë, për normalizimin e marrëdhënieve midis dy vendeve.
Foto: Aktivistë të opozitës janë barrikaduar përpara Kuvendit dhe Qeverisë së Kosovës, dhe janë zotuar se nuk do të zhvendosen që andej, deri në realizimin e kërkesave të tyre, për dorëheqjen e qeverisë dhe shpalljen e zgjedhjeve të parakohshme.
Aktivistët kanë ngritur edhe tenda dhe po qëndrojnë brenda tyre edhe gjatë natës...
Haradinaj thirrje deputetëve të mos e votojnë Thaçin
Disa nga liderët opozitar i janë drejtuar masës së tubuar që po kundërshton zgjedhjen e Hashim Thaçit në postin e presidentit të Kosovës.
Ramush Haradinaj, kryetar i Aleancës për Ardhmërinë e Kosovës, protestuesve u ka bërë thirrje deputeteve që mos të votojnë Hashim Thaçin për president të Kosovës. Sipas tij, Thaçin e “ka shkarkuar populli”, andaj ai nuk mund të jetë president i vendit.
Protestuesit tani janë drejtuar kah sheshi "Adem Jashari", i cili gjendet edhe më afër Kuvendit të Kosovës, për të mundësuar që, siç u tha, "zëri i tyre të dëgjohet" nga ligjvënësit.