Blog: Thaçi zgjidhet president i Republikës së Kosovës

Tubohen në shesh edhe mbështetësit e Hashim Thaçit

Një grup i qytetarëve, mbështetës i kandidatit kryesor për president të Kosovës, Hashim Thaçi tashmë ka mbërritur në sheshin qendër të Prishtinës. Ky grup qytetarësh po brohorit “Thaçi”... “Thaçi”. Kurse në duar mbajnë flamuj të Kosovës dhe ata shqiptar.

Mbështetësit e Thaçit janë tubuar vetëm pak metra larg atyre të opozitës. Mes dy grupeve zbarkuan njësitet speciale të Policisë së Kosovës, për të penguar përplasjen midis tyre.

Fotogaleri: Opozita kundërshton zgjedhjen e presidentit

• Radio Evropa e Lirë

Në Prishtinë janë tubuar aktivistë dhe mbështetës të opozitës, të cilët kundërshtojnë zgjedhjen e presidentit të Kosovës. Kuvendi pritet të nisë në orën 11 seancën e jashtëzakonshme, ndërsa kandidatë për president janë kryetari i Partisë Demokratike të Kosovës, Hashim Thaçi, dhe Rafet Rama nga e njëjta parti.

Deputetët dhe diplomatët e huaj fillojnë të hyjnë në Kuvend

Nën masa të shtuara të sigurisë deputetët, si dhe mysafirët, kryesisht ambasadorë të akredituar në Kosovë, kanë filluar të hyjnë në sallën qendrore të Kuvendit, për të përcjellë nga afër seancën e jashtëzakonshme për zgjedhjen e presidentit të Kosovës.

Për shkak të paralajmërimeve të opozitës se do të përpiqet të pengojë këtë seancë, sigurimi po zbaton një regjim të rreptë kontrolli për të gjithë ata që hyjnë në Kuvend, përfshirë këtu edhe deputetët dhe gazetarët.

Aktualisht, salla është e zbrazët, ndonëse seanca është thirrur të fillojë në orën 11:00.

Sheshi qendror në Prishtinë: Për dhe kundër Hashim Thaçit

​