Të rinjve të Mitrovicën e veriu dhe perspektivës së tyre në këtë pjesë të Kosovës, duhet t’u kushtohet më shumë kujdes, qoftë nga autoritetet lokale, qoftë nga ata që marrin pjesë në bisedimet në Bruksel, thonë për Radion Evropa e Lirë, disa qytetarë serbë të Mitrovicës së veriut.
Shumica prej tyre vlerësojnë se në Mitrovicë, pavarësisht trazirave politike para dhe pas vitit 1999, ngjarjet kulturore, argëtuese dhe edukative janë reduktuar në minimum.
Petar Jovanoviq, një i moshuar nga Mitrovica e veriut, thotë se në 16 vjetët e fundit, që nga ardhja e forcave ndërkombëtare, janë grumbulluar shumë probleme, të cilat askush nga kompetentët nuk ka tentuar t’i zgjidhë.
“Pozita e të rinjve këtu është mjaft problematike. Ata po shkojnë në rrugë të verbër. Në Mitrovicë ka mjaft narkomanë, por me këtë problem nuk po merret askush. Papunësia është tejet e lartë dhe ky është një problem shtesë. Po krijohet një revoltë te të rinjtë, dhe askush nuk u duket i mirë, asnjëri pushtet".
"Mendoj se Beogradi po ndihmon mjaft, por përsëri, gjithë ato para po orientohen gabimisht, nuk po ndahen në mënyrë lineare dhe tek ata njerëz që me të vërtetë kanë nevojë për ndihmë”, thekson Jovanoviq.
Bashkëqytetarja e tij, Ivanka Stankoviq, vlerëson se në veri të Kosovës ekzistojnë një mori çështjesh praktike, të cilat askush nga autoritetet lokale nuk po i zgjidh edhe më tej.
“Të rinjtë në Mitrovicën e veriut jetojnë si në geto dhe jo vetëm tash, por qe 16 vjet me radhë. Nuk ka perspektivë, e as punë. Ky universitet yni këtu edhe më tej ma shton kureshtjen se ku do të shkojnë gjithë këtë të rinj pas përfundimit të studimeve”.
“E di që një numër i vogël i tyre mbesin këtu dhe kryesisht janë të papunësuar, sepse punësimi është i vështirë për t’u arritur. Përveç institucioneve serbe, të cilat, me buxhetin e tyre i punësojnë të njëjtit njerëz me vite të tëra, mund të them se vetëm sektori joqeveritar është në dispozicion të rinjve”, thotë Stankoviq.
Por, sipas saj, punësimi në sektorin joqeveritar, nuk ofron ndonjë siguri perspektivë dhe siguri, sepse bëhet fjalë vetëm për projekte të caktuara.
Ajo sqaron se cila është oferta e qytetit për të rinjtë, lidhur me ngjarjet kulturore dhe edukative.
“Jeta kulturore në qytet nuk ekziston. Ky segment ka vdekur. Madje edhe kur organizohen disa manifestime kulturore, ato përsëri janë nën kujdesin e organizatave ndërkombëtare apo atyre joqeveritare. Komuna organizon dy apo tri koncerte ne vit, të tipit të Vitit të Ri ose për ndonjë festë".
"Nuk ekziston ndonjë repertor kulturor që u ofrohet jo vetëm të rinjve, por edhe qytetarëve në përgjithësi në Mitrovicën e veriut. Kinemaja, e cila është paralajmëruar moti se do të hapet, nuk është hapur. Qendra kulturore as që e di se çfarë punon, përveç për festën e Shën Vidit apo festat ortodokse. Të rinjtë kanë në dispozicion vetëm rrugën”, thekson Stankoviq.
Lubisha Nikoliq, po ashtu nga Mitrovica e veriut, thotë se mungon shumëçka për të rinjtë në këtë qytet. Sipas tij, papunësia është brengosëse, ndërkohë që tregu i punës është modest.
Ai thotë se të gjithë kompetentët flasin vazhdimisht për të rinjtë, por askush prej tyre nuk bën diçka konkrete për ta.
“Unë mendoj që problemi më i madh është arsimimi. Pra, njerëzit duhet të arsimohen dhe ta avancojnë veten nga brendia. Kur të jenë të kënaqur me të arriturat e tyre personale, atëherë ndoshta do të mund t’i ndërtojnë lidhjet dhe komunikimin, së pari me fqinjët e tyre këtu e më pas me pjesën tjetër të botës”, shprehet Nikoliq.
Në vitin 2014, komunat veriore të Kosovës, përfshirë edhe Mitrovicën e veriut, kanë marrë pjesë në zgjedhjet lokale të vendit, duke zgjedhur strukturat udhëheqëse në kuadër të institucioneve të Kosovës.
Qyteti i Mitrovicës vazhdon të jetë i ndarë, në anën veriore, të banuar me shumicë serbe dhe anën jugore, të banuar me shumicë shqiptare. Ura kryesore mbi lumin Ibër, e cila ndan veriun dhe jugun e qytetit është duke u riparuar, pas bllokimit disavjeçar.
Kjo urë, gjatë viteve të kaluara ka qenë skenë e shumë përplasjeve ndërmjet të rinjve shqiptarë dhe atyre serbë.
Mbi urë, ende mund të shihen patrullat statike të KFOR-it, EULEX-it dhe Policisë së Kosovës.
