Njohja nga 100 shtete dhe nënshkrimi i Marrëveshjes për Stabilizim-Asociim me Bashkimin Evropian përmenden si qëllimet kryesore afatshkurtra të diplomacisë kosovare.
Më 23 janar, Republika e Ganës u bë shteti i 86-të nga gjithsej 193 shtete anëtare të Kombeve të Bashkuara, e cila njohu shtetësinë e vendit. Pesë shtete të Bashkimit Evropian, megjithatë, nuk hyjnë në radhët e vendeve që pranojnë Kosovën si palë të barabartë në arenën ndërkombëtare.
Në Ministrinë e Punëve të Jashtme shfaqin shpresën që brenda këtij viti hapin për njohje ta hedhin edhe të paktën 14 shtete të tjera.
Zëvendësministri i Jashtëm, Ibrahim Gashi, tha se synim kryesor do të jetë tejkalimi i problemeve aktuale me Serbinë me qëllim përmirësimin e raporteve sidomos me pesëshen evropiane që s’e ka njohur Kosovën.
Ibrahim Gashi
“Kjo nuk është krejtësisht e lehtë për faktin se është një proces i ndërlikuar që ndërlidhet edhe me procesin e dialogut teknik, edhe me procesin e marrëveshjeve me Serbinë, të implementimit të tyre, por edhe me procesin e zgjidhjes së problemit me veriun. Mirëpo, ne do të jemi shumë të impenjuar, shumë të interesuar dhe të angazhuar që kjo të ndodhë”, tha Gashi.
Ministria e Jashtme pati hartuar, kohë më parë, një strategji për lobim dhe njohje të reja, me të cilën, ndër të tjera, parashihet të arrihet njohja e Kosovës nga shumica e shteteve anëtare të OKB-së, nga të gjitha vendet e BE-së dhe përfshirja e Kosovës si anëtar i barabartë në të gjitha organizatat dhe mekanizmat e bashkëpunimit rajonal.
Zëvendësministri Gashi shprehu bindjen se pas arritjes së një pajtimi Prishtinë-Beograd rreth mënyrës së përfaqësimit të Kosovës në nismat dhe forumet rajonale do të krijohej mundësia e lidhjes së marrëdhënieve kontraktuale me BE-në.
“Mendoj se gjetja e kësaj zgjidhjeje në mënyrë indirekte nënkupton se këto shtete nuk do t’i bllokojnë proceset që janë në interes për Kosovën, siç është ndërtimi i një raporti të ri, pra i një marrëdhënieje kontraktuale midis Kosovës dhe BE-së”, theksoi Gashi.
Me diplomatë të ndryshëm evropianë dhe ndërkombëtarë janë takuar, përgjatë muajve të kaluar, presidentja e Kosovës, Atifete Jahjaga, ministri i Jashtëm, Enver Hoxhaj dhe zëvendëskryeministri i parë për lobim dhe sjelljen e investimeve të huaja, Behgjet Pacolli.
Opozita vlerësoi se diplomacia, siç quhet, me shumë adresa nuk ka treguar efikasitetin e premtuar përgjatë pothuaj katër viteve prej se Kosova është shtet.
Deputeti nga radhët e Aleancës për Ardhmërinë e Kosovës, Ahmet Isufi, tha se ka pasur një neglizhencë në lobimin për njohje dhe se punët në këtë proces janë komplikuar nga, siç tha ai, ndarja joadekuate e punëve. Mosnjohja nga pesë vende të BE-së, sipas tij, dëshmon mungesën e suksesit.
“Ju po e shihni që asnjë hap s’është bërë në drejtim të Greqisë që është kaq afër, e të mos flasim për vendet, të cilat hezitojnë apo janë kundër pavarësisë së Kosovës. Kjo mënyrë e sjelljes diletante që po e bën Qeveria, po e pengon Kosovën në diplomacinë e jashtme për të rritur numrin e njohjeve”, u shpreh Isufi.
⚠️ Përmbajtja e ueb-faqes dhe/apo platformave të tjera digjitale të Radios Evropa e Lirë mbrohet nga ligjet amerikane dhe ndërkombëtare për të drejtën e autorit.
Mirëpresim ripërdorimin, ripublikimin dhe rishpërndarjen e përmbajtjes sonë, të publikuar në platformat tona digjitale, me kusht që të na citoni drejt si "Radio Evropa e Lirë", bashkë me linkun që çon te përmbajtja jonë origjinale.
