Bordi i Zyrës së Rregullatorit për Energji (ZRRE) ka vendosur që të obligojë shërbimet e shpërndarjes së energjisë elektrike që të kompensojnë konsumatorët të cilëve u janë faturuar shpenzimet e energjisë elektrike në katër komunat në veri të Kosovës.
Shërbimet e shpërndarjes në Kosovë janë Kompania e Furnizimit me Energji Elektrike të Kosovës (KESCO) dhe Kompania kosovare për Shpërndarje të Energjisë Elektrike (KEDS).
Kompensimi i konsumatorëve do të nisë nga 1 qershori i këtij viti dhe do të zgjasë deri më 28 shkurt 2030.
“Bordi i ZRRE-së, sipas aktgjykimit të Gjykatës, ka vendosur që të obligojë shërbimet e Shpërndarjes së energjisë elektrike që të kompensojë vetëm konsumatorët të cilët vërtetohet se kanë qenë aktivë dhe kanë kryer detyrimet e pagesave për periudhën nga data 06.02.2012 deri më datën 20.10.2017. Këta konsumatorë do të kompensohen duke u zbritur në faturat e rregullta mujore vlerën përkatëse të kompensimit”, thuhet në njoftimin e ZRRE-së.
SHIKONI EDHE: “Kjo nuk është e drejtë”: Qytetarët në veri për faturat e reja të rrymësQë nga përfundimi i luftës më 1999, banorët në katër komunat në veri të Kosovës, të banuara me shumicë serbe – Mitrovicë e Veriut, Zveçan, Leposaviq dhe Zubin Potok – nuk kishin paguar për rrymën e shpenzuar.
Deri në fund të vitit 2017, rrymën e shpenzuar në veri e kanë paguar qytetarët e pjesëve të tjera të Kosovës, të cilët kanë pranuar fatura me rritje. Atë vit, pas padisë së ngritur nga Avokati i Popullit, Gjykata Themelore në Prishtinë kërkoi që praktika e tillë të ndërpritje, pasi u konsiderua joligjore.
Në bazë të kësaj padie më 2021, detyroi ZRRE-në që të obligojë Kompaninë Kosovare për Distribuim me Energji Elektrike në Kosovë (KEDS) për kthimin e mbi 40 milionë eurove për qytetarët e Kosovës.
Vendimi është konfirmuar nga shkallë më të larta juridike, përkatësisht nga Gjykata e Apelit dhe Supremja.
Nga viti 2017, Qeveria e Kosovës pagoi faturat për rrymën në veri.
Ndërkaq, nga shkurti i këtij viti, qytetarët në veri kanë pranuar faturat e para për energjinë elektrike. Faturat i ka lëshuar kompania Elektrosever, që është në pronësi të kompanisë energjetike të Serbisë, EPS (Elektroprivreda Srbije).
Kjo kompani mori licencën për autoritetet në Kosovë më 24 qershor të vitit 2023.
SHIKONI EDHE: Në veri nis shpërndarja e faturave të rrymësFaturat e lëshuara në fund të shkurtit ishin me çmim fiks, ndërkaq në muajin mars, faturat u lëshuan në bazë të rrymës së shpenzuar.
Në fillim të dhjetorit të vitit 2023, Bashkimi Evropian kishte njoftuar se kompania serbe, Elektrosever, kishte nënshkruar kontratë komerciale për energji me KEDS-in.
Më 21 qershor të po atij viti, Kosova dhe Serbia e nënshkruan udhërrëfyesin për zbatimin e Marrëveshjes për Energji, që ishte arritur më 2013 në kuadër të dialogut të ndërmjetësuar nga Bashkimi Evropian.
Por, as marrëveshja e as udhërrëfyesi nuk gjetën zbatim. Marrëveshja e nënshkruar në kuadër të dialogut synon rregullimin e çështjes së furnizimit dhe faturimit të energjisë elektrike për katër komunat në veri të Kosovës.