Presidenti i Serbisë, Aleksandar Vuçiq, ka thënë të mërkurën se e ka paralajmëruar të dërguarin e Bashkimit Evropian për dialogun Kosovë – Serbi, Mirosllav Lajçak, për veprimet e Prishtinës në procesin e dialogut.
Dy zyrtarët kanë zhvilluar takime në Forumin Ekonomik Botëror, që po mbahet në Davos të Zvicrës.
“Bisedë e hapur me Mirosllav Lajçakun për situatën në Kosovë dhe Metohi dhe kërcënimet me të cilat përballet popullata serbe çdo ditë, të cilat kërcënojnë paqen dhe stabilitetin e rajonit”, ka thënë Vuçiq përmes një postimi në Instagram.
Vuçiq i ka përsëritur disa herë ato që i konsideron kërcënime ndaj popullatës serbe në Kosovë, por pa ofruar fakte për pretendimet e tij.
Sipas Vuçiqit, Serbia ka qasje të përgjegjshme në dialogun mes dy vendeve, por janë veprimet e Prishtinës ato që “vënë në pikëpyetje gjithçka që është arritur deri më tani në procesin e normalizimit të marrëdhënieve”.
Vetë Lajçak ka thënë pas takimit se me presidentin serb ka diskutuar për çështje urgjente.
“Pata diskutim të rëndësishëm me presidentin Vuçiq për zhvillimet e fundit në dialogun për normalizim të marrëdhënieve me Kosovën, si dhe për hapat e ardhshëm në periudhën pasuese”, ka thënë mes tjerash Lajçak përmes një postimi në X – platformë e njohur më parë si Twitter.
Had an important discussion with @predsednikrs on the latest developments in the Dialogue on the normalisation of relations with Kosovo, as well as the next steps in the coming period. We also spoke about urgent current issues. pic.twitter.com/AHAPe2aphY
— Miroslav Lajčák (@MiroslavLajcak) January 17, 2024
Në këtë Forum po merr pjesë edhe kryeministri i Kosovës, Albin Kurti, por nuk dihet nëse ai do të ketë një takim me Vuçiqin këto ditë.
Lexoni edhe këtë: Kurti takon O'Brien në Davos
Ditë më parë, Lajçak ka diskutuar për dialogun edhe me zëvëndëskryeministrin e Kosovës, Besnik Bislimi, po ashtu në Davos, me të cilin ka biseduar për tema të dialogut, me theks të veçantë nevojën për zbatimin e menjëhershëm të Marrëveshjes në rrugën drejt normalizimit të raporteve mes Kosovës dhe Serbisë.
Kjo Marrëveshje është arritur në shkurt të vitit të kaluar në Bruksel.
Në mars, në Ohër të Maqedonisë së Veriut, palët janë pajtuar për një aneks zbatimi, por sipas zyrtarëve të BE-së nuk janë marrë hapa në atë drejtim.
Marrëveshja për normalizim, prej 11 nenesh, ndër tjerash parasheh edhe një nivel të vetëmenaxhimit për komunitetin serb në Kosovë dhe njohje të ndërsjellë të simboleve shtetërore, ndërsa kërkon nga Prishtina dhe Beogradi që t’i zbatojnë, po ashtu, të gjitha marrëveshjet e mëhershme të arritura gjatë dialogut.
Lexoni edhe këtë: Petritsch: Dialogu i brendshëm me serbët në Kosovë, bazë për normalizim me SerbinëKosova dhe Serbia, nën ndërmjetësimin e BE-së, kanë nisur procesin e dialogut, me qëllim të normalizimit të marrëdhënieve, qysh më 2011.
Palët kanë arritur një mori marrëveshjesh, por jo të gjitha janë zbatuar.