Presidentja e Kosovës, Vjosa Osmani, ka biseduar me ambasadorin amerikan në Kosovë lidhur me konsultimet për caktimin e datës së zgjedhjeve të rregullta në Kosovë.
Viti 2025 në Kosovë është vit i rregullt zgjedhor dhe sipas Presidencës së Kosovës, në takim është diskutuar për “përkushtimin e plotë për garantimin e një procesi zgjedhor demokratik dhe të suksesshëm”.
Më 31 korrik, Osmani ftoi të gjitha partitë parlamentare në konsultime për caktimin e datës së zgjedhjeve. Në këtë takim nuk mori pjesë kreu i partisë në pushtet, Lëvizja Vetëvendosje, Albin Kurti.
Pas atij takimi, Osmani ka thënë se partitë kanë pasur propozime të ndryshme për datën e zgjedhjeve, por askush nuk ka insistuar për një të tillë. Disa nga datat e përmendura janë 26 janari ose 2, 9 dhe 16 shkurti.
SHIKONI EDHE: Në Kosovë fillojnë konsultimet për datën e zgjedhjeveViti i ardhshëm 2025 është vit i rregullt zgjedhor në Kosovë dhe nëse partitë politike bien dakord që të mos ketë zgjedhje të parakohshme, Qeveria aktuale e udhëhequr nga kryeministri Kurti do të jetë e para që do të përmbushë mandatin katërvjeçar që nga shpallja e pavarësisë.
Ndërkaq, në takimin e zhvilluar në Presidencën e Kosovës më 12 gusht, sipas njoftimit, Osmani dhe Hovenier, po ashtu kanë biseduar për fushën e sigurisë, pa dhënë më shumë detaje.
“Thellimi i vazhdueshëm i raporteve bilaterale dhe koordinimi i rregullt për tema të interesit nacional ishin po ashtu pjesë e diskutimeve në takimin e sotëm”, u tha në njoftim.
Diskutimi për thellimin e raporteve dypalëshe, vjen disa ditë pasi Departamenti amerikan i Shtetit inkurajoi Qeverinë e Kosovës, të udhëhequr nga Albin Kurti, që t’i kthehet “angazhimit konstruktiv” me Uashingtonin, Bashkimin Evropian, NATO-n dhe partnerët e tjerë ndërkombëtarë.
SHIKONI EDHE:
SHBA: Kosova po vë në rrezik mundësitë që ne i kemi ndihmuar të krijojëSHBA-ja thellësisht e zhgënjyer me vendimin e Kosovës për mbyllje të degëve të Postës së SerbisëSHBA-ja së fundi ka shprehur “zhgënjim” për, siç ka thënë, vendimet e pakoordinuara dhe të njëanshme të autoriteteve në Kosovë, pasi në fillim të gushtit në veri të Kosovës u mbyllën disa degë të Postës së Serbisë.
SHBA-ja, por edhe pjesëtarët e tjerë të komunitetit ndërkombëtar, po ashtu kanë kundërshtuar synimin e Qeverisë së Kosovës, që të hapë për trafik urën mbi lumin Ibër, që ndan Mitrovicën e Jugut të banuar me shqiptarë dhe atë të Veriut, të banuar me shumicë serbe.