Lajmet

Turqia s’do ta ratifikojë kandidaturën e Suedisë për NATO deri në tetor

Presidenti i Turqisë, Recep Tayyip Erdogan, duke u larguar nga vendi ku zhvilloi takim me kryeministrin suedez, Ulf Kristersson, dhe shefin e NATO-s, Jens Stoltenberg. Vilnius, 10 korrik 2023.

Presidenti i Turqisë, Recep Tayyip Erdogan, tha se Parlamenti i vendit të tij nuk do ta ratifikojë kandidaturën e Suedisë për anëtarësim në NATO së paku deri në tetor.

Duke folur për gazetarët në Vilnius, pas samitit të NATO-s, Erdogan tha se Parlamenti i Turqisë është në pushim për dy muaj dhe më pas “ka shumë propozime [të tjera] legjislative për të diskutuar”.

Turqia u pajtua që Suedia t’i bashkohej aleancës ushtarake në fillim të kësaj jave.

Ajo kundërshtoi me muaj, duke pretenduar se Suedia strehon anëtarë të grupeve militante, që Ankaraja i konsideron terroriste.

SHIKONI EDHE:

Zbërthimi i marrëveshjes Turqi-Suedi për NATO-nPas mbështetjes për Suedinë, Turqia pret hapa konkretë për anëtarësim në BE

Për të hyrë në NATO një vend, kandidatura e tij duhet të ratifikohet nga të gjitha vendet anëtare.

Hungaria ka shtyrë, po ashtu, ratifikimin e kandidaturës suedeze deri në vjeshtë.
Suedia, ashtu sikurse edhe Finlanda, braktisi politikën shumëvjeçare të neutralitetit ushtarak pasi Rusia nisi pushtimin e Ukrainës në shkurt të vitit të kaluar.

Finlanda u bë zyrtarisht anëtare e NATO-s në muajin prill.

Organizata më e madhe ushtarake në botë numëron 31 vende anëtare, në mesin e të cilave tri janë nga rajoni i Ballkanit Perëndimor: Shqipëria, Mali i Zi dhe Maqedonia e Veriut.