Lajmet

Familjarët kërkojnë t'i marrin trupat e pajetë të sulmuesve në Banjskë

Pjesëtarë të Policisë së Kosovës duke patrulluar në Banjskë të Zveçanit më 27 shtator 2023.

Familjarët e tre sulmuesve të vrarë gjatë përleshjeve të armatosur në Banjskë të Zveçanit janë interesuar që t'i marrin trupat e tyre, thanë për Radion Evropa e Lirë zyrtarë të Ministrisë së Drejtësisë së Kosovës (MD).

Nga MD-ja bënë të ditur se është kryer autopsia dhe të tre trupat e pajetë po mbahen në Institutin e Mjekësisë Ligjore, “në kushte adekuate derisa të lirohen nga Prokuroria”.

Më 24 shtator, Policia e Kosovës u sulmua nga një grup i armatosur dhe i maskuar, që sipas autoriteteve ishte i përbërë prej 30 personash.

Në sulmin ndaj Policisë së Kosovës u vra rreshteri Afrim Bunjaku. Më pas, autoritetet bënë të ditur se në përleshje mbetën të vrarë edhe tre sulmues.

Kosova ka fajësuar Serbinë për sulmin, por Beogradi ka mohuar se ka gisht në të.

SHIKONI EDHE:

Petkoviq akuzon Kosovën se do “që të fshehë prova” për sulmin në BanjskëIncidenti që la pasigurinë prapa

Më 29 shtator, Millan Radoiçiq, që tha se po jep dorëheqje nga Lista Serbe – partia kryesore e serbëve në Kosovë që gëzon mbështetjen e Beogradit – përmes avokatit të tij e pranoi se ka organizuar dhe ka marrë pjesë në sulmin në Banjskë, që Kosova e konsideron sulm terrorist.

Avokati i tij, Goran Petronijeviq, lexoi letrën e Radoiçiqit ku thuhej se ai kishte bërë të gjitha përgatitjet logjistike për ngjarjet e asaj dite.

“Arsyeja e kthimit tonë ishte inkurajimi i serbëve, popullit të asaj zone, për t’i rezistuar terrorit të regjimit të [të kryeministrit të Kosovës, Albin] Kurtit, duke mbrojtur njerëzit tanë, që çdo ditë i ekspozohen atij terrori”, tha Radoiçiq, sipas letrës.

SHIKONI EDHE:

Radoiçiq merr përgjegjësinë për sulmet në BanjskëVuçiq për Radoiçiqin: Nuk është akademik, por i mbron serbët

Më herët, autoritetet në Kosovë kanë publikuar dëshmi, sikurse një video të incizuar me dron, ku shihej Radoiçiqi i armatosur dhe i veshur me uniformë në Banjskë.

Kosova, përmes një rezolute të miratuar në Kuvend, ka bërë thirrje për hetim ndërkombëtar për Serbinë lidhur me rolin e saj në këtë sulm.

Sulmi ndaj Policisë së Kosovës është dënuar ashpër nga Shtetet e Bashkuara dhe Bashkimi Evropian.