Shifrat e rrëmbyeshëm dhe vërshimet goditën Slloveninë të premten, duke lënë të vdekur të paktën tre persona dhe duke detyruar qytetarët të evakuohen.
Si pasojë e motit të lig ka edhe dëme materiale në rrugë dhe ura.
Agjencia e Mjedisit të Sllovenisë, ARSO, rriti alarmin në nivelin më të lartë pas shirave të rrëmbyeshme që kanë goditur më së keqi pjesë veriore, veriperëndimore dhe qendrore të shtetit.
Shirat kanë vazhduar edhe të premten dhe autoritetet kanë paralajmëruar se mund të ketë vërshime të tjera pasi që lumenjtë kanë dalë nga shtrati.
Përmbytjet në Domzale, Slloveni, 4 gusht 2023.
Policia sllovene tha për agjencinë e lajmeve STA se tre persona kanë vdekur që kur shteti u godit nga stuhitë e shiut të enjten mbrëma. Një sllovene vdiq në qytetin Kamnik, ndërkaq dy shtetas holandez vdiqën në një zonë malore afër qytetit Kranj.
“Vdekja në Kamnik mund të jetë shkaktuar nga vërshimet, ndërkaq vdekjet në mal mund të jenë shkaktuar nga vetëtimat. Megjithatë, rrethanat e vdekjeve janë duke u hetuar”, tha zyrtarja policore, Maja Adleshiq Ciperle.
Ushtria e shtetit është angazhuar në ndihëm e qytetarëve pas motit të lig.
SHIKONI EDHE: Si po i nxit El Ninjo motin ekstrem dhe valët e nxehtësisë“U bëjmë thirrje të gjithë qytetarëve që nuk kanë çështje urgjente të qëndrojnë në shtëpi dhe të mos udhëtojnë me veturat e tyre”, tha ministri i Mbrojtjes, Marjan Sharec.
Sllovenia është përballur me disa stuhi të fuqishme në fillim të kësaj vere, që lanë të vdekur një person. Edhe rajoni po ashtu u godit nga moti i lig, duke lënë të vdekur të paktën katër persona.
Ekspertët thonë se moti ekstrem po nxitet pjesërisht nga ndryshimet klimatike. Pjesë të Evropës kanë përjetuar temperatura përvëluese dhe janë përballur me zjarre gjatë kësaj vere.
Autoritetet kanë mbyllur për trafik më 4 gusht një autostradë që lidh Slloveninë me Italinë dhe Ustrinë, për shkak të motit të lig.
Një person duke ecur pranë pemëve të rrëzuara gjatë përmbytjeve në Medvode, Slloveni, 4 gusht 2023.
Për shkak të vërshimeve, në Slloveni afër 16.000 amvisëri kanë mbetur pa energji elektrike, ndërkaq pengesa ka pasur në shërbimet hekurudhore.
Në Kroaci, autoritetet kanë ngritur alarmin për mot të lig në pesë rajone, duke paralajmëruar se për shkak të motit të lig mund të ketë ndërprerje të energjisë elektrike dhe ujit.
Alarm me ngjyrë të verdhë është lëshuar edhe për pjesën tjetër të Kroacisë, që nënkupton se moti mund të jetë potencialisht i rrezikshëm.
Për shkak të motit të lig, alarm po ashtu është lëshuar edhe në Bosnje e Hercegovinë.
Stuhi të fuqishme pritet të godasin edhe Italinë. Në Milano, janë mbyllur parqet dhe zonat e tjera ku ka pemë të mbjella, nga frika se ato mund të rrëzohen dhe të paraqesin rrezik për qytetarët.