Situatë e qetë në komunat në veri të Kosovës

Policia e Kosovës tha se në komunat në veri të Kosovës, të banuara me shumicë serbe, situata është e qetë.

Veton Elshani nga Policia e Kosovës i tha Radios Evropa e Lirë se situata në veri është stabile dhe se zyrtarët policorë po vazhdojnë të qëndrojnë afër ndërtesës së Komunës së Zveçanit, Leposaviqit dhe Zubin Potokut. Ai që shtoi se nuk ka pasur asnjë incident gjatë natës.

Më 26 maj, në këto tri komuna grupe të serbëve lokalë u përleshën me Policinë e Kosovës, e cila asistoi kryetarët e rinj shqiptarë që të hynin në zyrat e tyre. Ndërtesat e këtyre komunave paraprakisht janë përdorur nga strukturat paralele serbe.

*Video: Rritja e tensioneve në veri

Nën gaz lotsjellës, kryetarët hynë në zyrat në veri

Policia përdori shok-bomba dhe gaz lotsjellës për të shpërndarë protestuesit, ndërkaq serbët lokalë hodhën gurë në drejtim të policëve.

Në Zveçan pati edhe të shtëna me armë zjarri.

Disa vetura policore u dogjën, ndërkaq pesë policë u lënduan gjatë përleshjeve.

Sekretari i Përgjithshëm i NATO-s, Jens Stoltenberg, tha se ka biseduar me shefin e diplomacisë së Bashkimit Evropian, Josep Borrell, lidhur me situatën në Kosovë.

Më 28 maj, Stoltenberg i bëri thirrje Kosovës që të shtensionojë situatën dhe të mos ndërmarrë "hapa të njëanshëm dhe destabilizues".

SHIKONI EDHE: NATO dhe BE: Kosova të mos ndërmarrë hapa të njëanshëm dhe destabilizues

Autoritetet në Kosovë kanë mbrojtur vendimin e tyre që kryetarët e rinj të veriut të hynin në zyrat e tyre.

Por, faktori ndërkombëtar e cilësoi shkuarjen në komunat në veri të kryetarëve të rinj si “hyrje me forcë”, duke dënuar veprimet e Prishtinës.

SHIKONI EDHE:

Kurti: I kuptojmë shqetësimet e partnerëve, por çdo opsion tjetër do të ishte mospërmbushje e obligimeveOsmani: Beogradi po instrumentalizon serbët në veri për të krijuar vakum institucional

Shtetet e Bashkuara i kanë kërkuar Qeverisë së Kosovës që të përmbahet nga “veprimet tjera që mund të rrisin tensionet dhe të promovojnë dhunë".

Sekretari amerikan i Shtetit, Antony Blinken, paralajmëroi se këto veprime do të rezultojnë me pasoja në raportet dypalëshe SHBA-Kosovë.

Veprimet e Kosovës janë dënuar edhe nga Bashkimi Evropian, shtetet e QUINT-it (SHBA-ja, Mbretëria e Bashkuar, Italia dhe Franca), ndërkaq NATO ka kërkuar nga të dyja palët që të zgjidhin mosmarrëveshjet përmes dialogut.

SHIKONI EDHE:

Blinken: Kurti t’i ndalojë menjëherë masat e dhunshmeNATO i kërkon Kosovës të "shtensionojë menjëherë situatën" në veri

Serbia ka ngritur në nivelin më të lartë gatishmërinë luftarake të forcave të saj, pas trazirave në veri. Ndërkaq, Lista Serbe, partia kryesore e serbëve në Kosovë, ka kërkuar nga Beogradi që të ndërpresë dialogun me Prishtinën, që ndërmjetësohet nga Brukseli.

Në katër komunat në veri të Kosovës, në zgjedhjet lokale të 23 prillit u zgjodhën katër kryetarë të rinj shqiptarë, pasi në këto zgjedhje të jashtëzakonshme nuk morën pjesë partitë serbe.

SHIKONI EDHE: Lista Serbe kërkon ndërprerjen e dialogut Kosovë-Serbi

Zgjedhjet u mbajtën pas dorëheqjes së kryetarëve nga radhët e Listës Serbe - partisë më të madhe të serbëve të Kosovës - në nëntor të vitit të kaluar.

Kjo parti i braktisi të gjitha institucionet e Kosovës, për shkak të vendimit të Qeverisë në Prishtinë për të kryer procesin e riregjistrimit të makinave me targa ilegale serbe.

Zgjedhjet u bojkotuan nga popullata shumicë serbe në atë zonë, e cila tani nuk i pranon rezultatet, përkatësisht kryetarët e rinj.

Pjesëmarrja në zgjedhjet e prillit ishte 3.47 për qind e numrit të përgjithshëm të votuesve të regjistruar.