Ambasadori amerikan i Prishtinë, Jeff Hovenier, i ka kërkuar guvernatorit të Bankës Qendrore të Kosovës, Ahmet Ismaili, që të shtyjë zbatimin e vendimit për përdorimin vetëm të valutës euro sa i përket operacioneve me para të gatshme.
Kërkesë të njëjtë SHBA-ja ka bërë edhe ditë më parë.
Rregullorja e miratuar nga BQK-ja, që nga serbët në Kosovë është parë si vendim që do t’iu pamundësojë atyre të përdorin dinarin, është paraparë të hyjë në fuqi më 1 shkurt.
“Sot zhvillova një takim produktiv me guvernatorin e Bankës Qendrore të Kosovës, Ahmet Ismaili. Përsërita shqetësimet e SHBA-së lidhur me zbatimin e rregullores së miratuar për operacionet me para të gatshme. Ne bëjmë thirrje që zbatimi i kësaj rregulloreje të shtyhet, në mënyrë që të japë kohë për tranzicion më efektiv dhe komunikim me publikun që të zbutet ndikimi negativ te qytetarët”, shkroi Hovenier në X, që më herët njihej si Twitter.
Today I had a productive meeting with the Governor of the Central Bank of Kosovo, Ahmet Ismaili. I reiterated U.S. concerns about the implementation of the amended regulation on cash operations. We urge that enforcement be postponed to allow ample time for effective transition… pic.twitter.com/MuVgxoxzC3
— Ambassador Jeff Hovenier (@USAmbKosovo) January 29, 2024
Takimi mes ambasadorit Hovenier dhe guvernatorit Ismaili erdhi një ditë pasi shtetet e QUINT-it – SHBA-ja, Britania, Gjermani, Italia dhe Franca – bënë kërkesën e njëjtë për shtyrjen e zbatimit të vendimit për rregulloren për operacione me para të gatshme.
Nga Qeveria e Kosovës kanë argumentuar se vendimi i BQK-së është në përputhje me Kushtetutën e Kosovës, por QUINT-i ka thënë se ky vendim “ngre shqetësime në lidhje me ndikimin në veçanti në komunitetet me shumicë serbe”.
Hovenier, pas një ngjarjeje të organizuar në Prishtinë, më 29 janar deklaroi për mediat se SHBA-ja respekton Kushtetutën e Kosovës dhe dëshiron që ajo të zbatohet plotësisht.
"SHBA-ja absolutisht e pranon Kushtetutën e Kosovës. Ne presim që Kushtetuta në tërësinë e saj të zbatohet plotësisht. Sa i përket kësaj çështjeje specifike, ne mendojmë se kjo rregullore mund të ketë pasoja që nuk janë menduar plotësisht", tha ai.
Lexoni edhe këtë:
QUINT kërkon pezullimin e zbatimit të vendimit të BQK-së për dinarinKurti i thotë QUINT-it se euroja është valuta e vetme e lejuar në KosovëKërkesa e SHBA-së për dinarin “të respektohet për t’u dhënë kohë serbëve”Ndërkaq, Bashkimi Evropian paraprakisht kishte deklaruar se ka kërkuar sqarime nga Kosova për këtë vendim, i cili sipas Listës Serbe – partisë kryesore e serbëve në Kosovë, që gëzon mbështetjen e Serbisë – rrezikon mbijetesën e serbëve në Kosovë.
Blloku evropian më 29 janar po ashtu kërkoi shtyrjen e zbatimit të vendimit të BQK-së, në mënyrë që të gjendet një zgjidhje në kuadër të dialogut në Bruksel.
Në Kosovë, në të gjitha vendbanimet me shumicë serbe, popullsia përdor dinarin serb për të kryer pagesa dhe ata që punojnë në institucionet serbe në Kosovë, i marrin edhe pagat me dinarë.
Me dinarë paguhen edhe pensionet, sipas sistemit serb, si dhe shtesat për fëmijë dhe ndihmat sociale.
Në objektet tregtare, në zonat ku banojnë serbët në Kosovë, përveç euros, përdoret edhe dinari.