Rusia i ka vazhduar të dielën sulmet e pareshtura kundër infrastrukturës energjetike të Ukrainës.
Autoritetet në rajonin jugor Mikolaiv thanë se dronët kamikazë rusë e goditën një ngrohtore dhe e dëmtuan një hotel mëngjesin e së dielës.
Pamjet e publikuara nga shërbimet emergjente në Telegram shfaqin gërmadhat dhe dëmet e shkaktuara në një ndërtesë dhe në një kënd të lojërave për fëmijë. Nuk u raportua për viktima.
Forca Ajrore e Ukrainës tha se i ka shkatërruar një dron të lëshuar nga Rusia mbi Mikolaiv, dhe katër dronë të tjerë në pjesë të tjera të vendit.
Sulmi i sotëm është vazhdimësi e sulmeve të së shtunës, kur ushtria ruse kreu sulme ajrore kundër termocentraleve dhe hidrocentraleve në disa rajone ukrainase.
DTEK, kompania më e madhe energjetike e Ukrainës, tha të shtunën se katër termocentrale të saj u goditën nga sulmet ajrore ruse.
Duke folur të shtunën pas sulmeve, presidenti i Ukrainës, Volodymyr Zelensky, iu lut sërish aleatëve të Kievit për kundërajrorë dhe për furnizim të shpejtë me armë.
Zelensky tha se zonat që i furnizojnë me gaz natyror vendet e Bashkimit Evropian janë në veçanti në shënjestrën e sulmeve ruse.
“Caku kryesor ishte sektori i energjisë, objekte të ndryshme në këtë industri, ato energjetike dhe të gazit. Në veçanti, objektet e gazit që janë jetike për sigurimin e furnizimit të sigurt për Bashkimin Evropian”, tha Zelensky.
SHIKONI EDHE: Zelensky u lutet sërish aleatëve të Ukrainës për kundërajrorë dhe furnizim të shpejtë me armëNë muajt e fundit, ushtria ruse i ka rritur dhe shpeshtuar sulmet kundër infrastrukturës energjetike të Ukrainës, duke i goditur termocentralet dhe hidrocentralet pothuajse përditë.
Zyrtarët ukrainas kanë thënë se vendi e ka humbur rreth 80 për qind të prodhimin të rrymës nga termocentralet dhe 35 për qind nga hidrocentralet, duke e detyruar Qeverinë ta vendosë reduktime të rrymës në disa rajone.
Edhe infrastruktura ruse e naftës dhe gazit është sulmuar kohëve të fundit, përfshirë një rafineri e naftës në rajonin rus Krasnodar, e cila të shtunën e ndërpreu punën, pas një sulmi të dyshuar ukrainas me dronë.
Ukraina, e cila rrallëherë komenton rreth sulmeve të saj në zonat ruse, nuk e ka marrë përgjegjësinë për këtë sulm.