Presidenti i Rusisë, Vladimir Putin, ka urdhëruar forcat e armatosura ruse që të zbatojnë një armëpushim përgjatë vijës së kontaktit me trupat ukrainase, më 6 dhe 7 janar, për festën e Krishtlindjes ortodokse.
Në urdhrin e tij, të publikuar në faqen e internetit të Kremlinit, më 5 janar, Putin ka thënë se armëpushimi do të fillojë në mesditë, më 6 janar dhe do të zgjasë deri në mesnatë, më 7 janar.
Ai i ka bërë thirrje Kievit që të respektojë këtë hap, për t’iu mundësuar civilëve që banojnë përgjatë vijës së kontaktit t’i vizitojnë kishat në prag të Krishtlindjes dhe të kremtojnë festën.
Kievi e hodhi poshtë këtë kërkesë.
Këshilltari i presidentit ukrainas Mykhailo Podolyak tha: “Mbajeni hipokrizinë tuaj për vete”.
First. Ukraine doesn%27t attack foreign territory & doesn%27t kill civilians. As RF does. Ukraine destroys only members of the occupation army on its territory...Second. RF must leave the occupied territories - only then will it have a "temporary truce". Keep hypocrisy to yourself.
— Михайло Подоляк (@Podolyak_M) January 5, 2023
Ukraina “nuk sulmon territore të huaja dhe nuk vret civilë”, por “shkatërron vetëm anëtarët e ushtrisë okupuese në territorin e saj”, shkroi Podolyak në Twitter.
Ai shtoi se një “armëpushim i përkohshëm” do të jetë i mundur vetëm kur Rusia të largohet nga territori që ka pushtuar në Ukrainë.
Urdhri i Putinit për armëpushim erdhi pasi më herët gjatë 5 janarit, lideri shpirtëror i Rusisë, Patriarku Kirill, bëri thirrje për një marrëveshje armëpushimi gjatë Krishtlindjes ortodokse, që festohet këtë javë.
Kisha Ortodokse Ruse përdor kalendarin e vjetër Julian dhe feston Krishtlindjet më 7 janar.
Këshilltari i presidentit ukrainas, Mykhailo Podolyak, e hodhi poshtë thirrjen e Kirill si një “kurth cinik dhe element propagande”.
Përkujtojmë se kreu i Kishës Ortodokse Ruse, Kirill, më parë e justifikoi luftën si pjesë e “luftës metafizike” ruse për të parandaluar “sulmin ideologjik liberal nga Perëndimi”.
SHIKONI EDHE: Putin: I gatshëm për bisedime me Ukrainën nëse pranon realitetet e reja territorialeMë herët, gjatë së enjtes, presidenti rus i tha homologut turk, Recep Tayyip Erdogan, se është i hapur për dialog me Ukrainën nëse Kievi pranon se territoret e pushtuara nga Moska janë territore ruse, njoftoi Kremlini.
Ndërkaq, sipas njoftimit të Ankarasë, Erdogan i kërkoi Putinit shpalljen e armëpushimit “të njëanshëm” në Ukrainë.