Ish-lideri separatist i Katalonjës, Carles Puigdemont, u rikthye në Spanjë të enjten pas shtatë vjetëve në mërgim, dhe mori pjesë në një tubim në Barcelonë, duke e shtyrë policinë spanjolle ta nisë një kërkim të madh për kapjen e tij.
Me gjithë praninë e madhe policore, Puigdemont foli para mijëra ndjekësve të vet në kryeqytetin katalonas në afërsi të Parlamentit katalonas, duke u thënë atyre se synon ta ringjallë përpjekjen për pavarësi, e cila e kishte zhytur Spanjën në krizë politike më 2017.
“Ata mendonin se do ta festonin arrestimin tim dhe mendonin se ky ndëshkim do të na dekurajonte neve dhe juve. Epo, gabuan”, tha ai.
SHIKONI EDHE: Gjykata spanjolle mban në fuqi fletarrestimet për separatistët katalonasPasi e përfundoi fjalimin, Puigdemont doli mbrapa skenës, dhe policia e mediat nuk ishin në gjendje ta gjenin vendndodhjen e tij më.
Një person me altoparlant i bëri thirrje turmës ta shoqëronte Puigdemontin në një marsh drejt Parlamentit të Katalonjës. Por, derisa zyrtarë të lartë të partisë Junts së Puigdemontit dhe anëtarë të partisë së moderuar separatiste, Esquerra Republicana de Catalunya, marshuan drejt ndërtesës parlamentare, Puigdemonti u fut në një veturë të bardhë policore, e cila i takonte një zyrtar të policisë rajonale, tha një burgim i Qeverisë katalonase.
Rrëmujë në trafik
Kërkimi për liderin separatist shkaktoi rrëmujë në trafik në Barcelonë dhe në afërsi të kufirit me Francën, pasi policia vendosi postblloqe dhe i kontrolloi veturat.
Kërkimi për Puigdemontin u anulua më vonë, tha një zëdhënës i Mossos, policisë katalonase, pa shpjeguar pse.
Policia rajonale katalonase kontrollon veturat në një rrugë në Barcelonë, 8 gusht 2024.
Disa mbështetës të Puigdemontit u përleshën me policinë në përpjekje për ta thyer kordonin që rrethonte një park ku ndodhet ndërtesa e Parlamentit. Policia përdori shkopinj dhe sprej për t’i frenuar protestuesit.
Puigdemont, 61 vjeç, iku në Belgjikë para shtatë vjetëve, pas përpjekjes së dështuar për ndarjen e Katalonjës nga Spanja. Ai ka jetuar në Belgjikë prej atëherë.
Në Katalonjë, më 1 tetor të vitit 2017, u mbajt një referendum, në të cilin shumica e atyre që morën pjesë, votuan për pavarësi nga Spanja.
Parlamenti në Barcelonë më pas e e shpalli rajonin autonom republikë të pavarur.
Megjithatë, në referendum pjesëmarrja ka qenë e ulët dhe ai është shpallur i paligjshëm nga Gjykata Kushtetuese e Spanjës.
Qeveria qendrore në Madrid ka shtrirë qeverisjen në rajon dhe disa udhëheqës katalanas kanë ikur nga vendi ose janë ndaluar.