Propaganda online është përdorur për t’i bindur dhe rekrutuar të rinjtë në Kosovë, Shqipëri dhe Maqedoni për mbështetjen e grupeve të ndryshme luftuese në Siri dhe Irak, thuhet në një raport të Qendrës Kosovare për Studime të Sigurisë (QKSS).
Në këtë raport thuhet se shpërndarja e materialeve propaganduese të të ashtuquajturit Shteti Islamik dhe organizatave të tjera në gjuhën shqipe, kanë ndikuar në rritjen e përkrahjes për IS-in.
Sipas të gjeturave, profilet individuale të ekstremistëve të dhunshëm mbështetjen më të madhe e kanë për imamët e dënuar për veprat terroriste, lidhur me rekrutimin e pjesëmarrësve në Kosovë, Shqipëri dhe Maqedoni.
Hulumtimi i publikuar tregon për aplikacionet më të përdorura të individëve të radikalizuar të cilat janë: Facebook, Telegram (aplikacion rus) dhe Youtube.
Ndër të tjera në raport theksohet se një dukuri interesante gjatë muajve të fundit ishte edhe thirrja e individëve me bindje ekstremiste në rrjete sociale për të bojkotuar zgjedhjet në Kosovë dhe Shqipëri, për shkak se diskursi i partive është në kundërshtim me parimet e këtyre grupeve ekstremiste radikale dhe se pjesëmarrja e qytetarëve në proceset demokratike është në kundërshtim me parimet e këtyre grupeve ekstremiste.