Për të dytën ditë me radhë ka vazhduar operacioni ushtarak i ushtrisë izraelite në Bregun e pushtuar Perëndimor. Gjatë këtij operacioni kanë vdekur të paktën dhjetë palestinezë dhe mijëra të tjerë janë zhvendosur nga shtëpitë e tyre, përderisa Qeveria izraelite tha se ka “goditur me forcë të madhe” një bastion të militantëve.
Operacioni, që u nis nga Qeveria e krahut të djathtë e kryeministrit Benjamin Netanyahu, ka shënjestruar qytetin verior të Xheninit dhe në operacion janë përdorur automjete të blinduara, buldozerë të ushtrisë dhe janë kryer sulme me dronë.
Mëngjesin e së martës, dyqanet në Xhenin ishin të mbyllura dhe pak njerëz u panë në rrugët e këtij qyteti, që një ditë më parë u përfshi në luftime.
Në kampin e refugjatëve në Xhenin – shtëpi e 18.000 personave – rrugët janë shkatërruar.
Ushtria izraelite tha se “aktivitetet kundërterroriste” në Xhenin kanë vazhduar gjatë natës, me forcat që kanë vepruar për të “neutralizuar” një bunker që përdorej për të ruajtur mjete shpërthyese në kampin e refugjatëve.
“Për më tepër, ushtarët kanë lokalizuar dhe shkatërruar dy dhoma që përdoreshin për kryerjen e operacioneve dhe u përkisnin organizatave terroriste në këtë zonë”, tha ushtria e Izraelit nëpërmjet një deklarate më 4 korrik.
Këshilltari për siguri kombëtare në Izrael, Tzachi Hanebi, tha se operacioni ushtarak është afër përmbushjes së synimeve.
Para këtij operacioni, Izraeli veçse kishte shpeshtuar bastisjet në veri të Bregut Perëndimor, ku ka pasur rritje të sulmeve ndaj izraelitëve, por edhe dhunë ndaj palestinezëve nga kolonët hebrenj.
Teksa po zhvillohet operacioni ushtarak në Xhenin, në Tel Aviv janë plagosur shtatë persona pasi u shkelën nga një veturë, thanë autoritetet.
Policia tha se ka marrë raportime se “një veturë ka sulmuar disa civilë” në veri të Tel Avivit. Autoritetet kanë "përgëzuar" një qytetar që ka qëlluar për vdekje sulmuesin në Tel Aviv.
Autoritetet thanë se sulmi u krye nga palestinezi 20 vjeç, Abed Elohab Halaila nga Bregu Perëndimor.
Grupi militant palestinez, Hamas, më herët tha se sulmi ishte "përgjigje natyrale" ndaj aktiviteteve të Izraelit në Xhenin.
Lexoni edhe këtë: Shefi i OKB-së kërkon nga Izraeli dhe palestinezët të ndalin dhunënDhuna ndërmjet izraelitëve dhe palestinezëve është përkeqësuar që nga viti i kaluar dhe është përshkallëzuar edhe më tej nën koalicionin qeverisës të Netayahut, që përfshin edhe parti të ekstremit të djathtë.
“Në pesë vjetët e fundit, kjo është bastisja më e keqe”, tha Qasem Benighader, infermier në një spital, duke shtuar se “shumë” pacientë kanë lëndime me armë zjarri dhe nga mjetet shpërthyese.
Zëdhënësi i ushtrisë, Daniel Hagari, u tha gazetarëve se trupat izraelite “nuk synojnë që të qëndrojnë në kamp”, por “ne jemi të gatshëm për situata më të rënda” nëse luftimet vazhdojnë.
Ministria palestineze e Shëndetësisë tha se dhjetë persona janë vrarë dhe 100 të tjerë janë plagosur, 20 prej të cilëve janë në gjendje të rëndë.
Një ushtar i plagosur izraelit u evakuua me një helikopter ushtarak.
Që nga nisja e operacionit, afër 3.000 persona janë larguar nga kampi i refugjatëve në Xhenin, tha për AFP-në zëvendësguvernatori i këtij qyteti, Kamal Abu al-Roub. Ai shtoi se ata do të strehohen në shkolla dhe në strehimore të tjera në qytetin e Xheninit.
Të vrarë e të plagosur nga sulmet izraelite në Bregun Perëndimor
Kombet e Bashkuara kanë thënë se kampi i Xheninit “është një prej kampeve me nivelin më të lartë të papunësisë dhe varfërisë” në mesin e kampeve që gjenden në Bregun Perëndimor, dhe se operacioni ushtarak ka shkaktuar ndërprerje të mëdha të furnizimeve me ujë dhe rrymë “në pjesën më të madhe” të kampit.
Netanyahu tha se forcat izraelite “në çerdhen e terroristëve në Xhenin” po “shkatërrojnë qendrat komanduese dhe po vazhdojnë të konfiskojnë armë të shumta”.
Ndërkaq, ministri i Jashtëm izraelit, Eli Cohen, u tha gazetarëve se Izraeli po sulmon “me forcë të madhe”.
Ministria e Jashtme palestineze e quajti përshkallëzimin “luftë të hapur kundër banorëve të Xheninit”.
Xhenini normalisht kontrollohet nga Autoriteti Palestinez i presidentit Mahmud Abbas, që ka pjesërisht kontroll administrativ në Bregun Perëndimor.
Partia udhëheqëse, Fatah, ka shpallur grevë të përgjithshme, duke prekur bizneset private dhe sektorët e tjetër. Greva ka bërë që të gjithë punëtorët e Autoritetit Palestinez të qëndrojnë në shtëpitë e tyre.
Sekretari i përgjithshëm i OKB-së, Antonio Guterres, nëpërmjet një deklarate tha se është “thellësisht i shqetësuar” lidhur me dhunën dhe bëri thirrje që të respektohet ligji ndërkombëtar humanitar.
Edhe Jordania fqinje ka ngritur shqetësime të ngjashme dhe Emiratet e Bashkuara Arabe kërkuan “ndërprerjen e menjëhershme të fushatave kundër popullit palestinez”.
Shtetet e Bashkuara thanë se Izraeli ka të drejtë “të mbrojë popullin e tij kundër... grupeve terroriste”. Por, Uashingtoni bëri thirrje që të mbrohen civilët.
Lexoni edhe këtë: SHBA-ja përkrah Izraelin pas sulmit në Bregun PerëndimorKur nisi operacioni, ushtria izraelite tha se ai po zhvillohej kundër grupit Brigada e Xheninit, dhe se kishte shënjestruar një depo me armë të këtij grupi dhe një ndërtesë “për zbulim dhe mbikëqyrje” dhe një vend ku supozohet se fshiheshin personat që kishin sulmuar izraelitët.
Izraeli e pushtoi Bregun Perëndimor gjatë luftës gjashtëditore në vitin 1967.
Duke përjashtuar Jerusalemin Lindor, territori i pushtuar është shtëpi e afër 490.000 palestinezëve që jetojnë në vendbanime që konsiderohen ilegale sipas ligjit ndërkombëtar.
Palestinezët, që kërkojnë të krijojnë shtetin e tyre të pavarur, kërkojnë tërheqjen e izraelitëve nga të gjitha territoret e pushtuara gjatë luftës gjashtëditore dhe të shkatërrojnë të gjitha vendbanimet hebreje.
Megjithatë, kryeministri izraelit, Benjamin Netanayhu, është zotuar për “forcimin e vendbanimeve” dhe nuk ka shprehur interesim për rinisjen e bisedimeve të paqes, të cilat nuk janë zhvilluar që nga viti 2014.