Presidenti i Ukrainës, Volodymyr Zelensky, falënderoi SHBA-në për, siç tha, mbështetjen “e paprecedentë” për Ukrainën.
Sipas një deklarate të publikuar në ueb-faqen e Presidencës ukrainase, Zelensky i bëri komentet gjatë takimit me sekretarin amerikan të Shtetit, Antony Blinken, dhe sekretarin e Mbrojtjes, Lloyd Austin, të cilët qëndruan në Kiev të dielën vonë.
“Ne e vlerësojmë ndihmën e paprecedentë të Shteteve të Bashkuara për Ukrainën. Unë do të doja të falënderoja presidentin [amerikan Joe] Biden personalisht dhe në emër të të gjithë popullit ukrainas për udhëheqjen e tij në mbështetje të Ukrainës”, tha Zelensky.
Gjatë qëndrimit në Kiev, Blinken dhe Austin premtuan më shumë se 700 milionë dollarë ndihmë ushtarake, direkte dhe jodirekte, për Ukrainën, e cila ndodhet nën pushtimin rus qysh më 24 shkurt.
Administrata e presidentit amerikan, Joe Biden, ka ndarë tashmë disa miliarda dollarë për këtë vend.
Zyrtarët amerikanë përsëritën se ndihma nuk nënkupton përfshirje të drejtpërdrejtë të SHBA-së në Ukrainë.
Kreu i Pentagonit, Austin, tha se beson se Ukraina mund ta fitojë luftën “nëse i ka pajisjet e duhura”.
Për më shumë, lexoni këtu.