Një grup qytetarësh kanë ndërmarrë të enjten iniciativë për zëvendësimin e kryetarit të Mitrovicës së Veriut, Erden Atiq.
Kërkesa i është dorëzuar kryetarit të Kuvendit të kësaj komune, Nexhat Uglanin.
“Tani jam i detyruar të informoj Ministrinë për Vetëqeverisje Lokale dhe Komisionin Qendror Zgjedhor, dhe kam pesë ditë të shqyrtoj kërkesën e tyre”, ka thënë Uglanin për Radion Evropa e Lirë.
Këta janë disa prej hapave që parasheh një udhëzim administrativ për zëvendësimin e kryetarit, të cilin Qeveria e Kosovës e ka miratuar në fillim të muajit shtator.
Ky udhëzim hap rrugën për mbajtje të zgjedhjeve lokale në katër komuna në veri të Kosovës – Mitrovicë e Veriut, Zveçan, Leposaviq dhe Zubin Potok.
Mbajtjen e zgjedhjeve të reja e ka kërkuar edhe komuniteti ndërkombëtar, pas protestave që kanë mbajtur banorët lokalë në këto komuna, duke refuzuar kryetarët e rinj shqiptarë.
Ata i kanë fituar zgjedhjet e mbajtura në prill, të cilat i ka bojkotuar komuniteti serb.
SHIKONI EDHE: A do të ketë zgjedhje të reja në veri të Kosovës?
Situata me raste është përshkallëzuar në protesta, sidomos më 29 maj, kur një grup serbësh janë përleshur me pjesëtarë të misionit të NATO-s në Kosovë, KFOR.
Qeveria e Kosovës është pajtuar për mbajtje të zgjedhjeve të reja, me kusht që kryetarët aktualë të largohen vetëm përmes ligjit.
Ministri i Administrimit të Pushtetit Lokal, Elbert Krasniqi, ka përkujtuar më 6 dhjetor, se cilët hapa duhet të ndiqen për largim të kryetarit, dhe ka thënë se janë të gatshëm të kryejnë detyrat, sapo procedura të nisë zyrtarisht.
Hapat drejt zgjedhjeve, sipas udhëzimit
Udhëzimi administrativ për largim të kryetarit të komunës, i lëshuar nga Ministria e Administrimit të Pushtetit Lokal, i parasheh këta hapa:
- Kërkesa duhet të bëhet nga i ashtuquajturi grup nismëtar, i cili përbëhet nga tre apo më shumë persona me të drejtë vote në komunën përkatëse.
- Ky grup e njofton kryesuesin e kuvendit komunal për kërkesën në fjalë, dhe pajisjet me dokumentacionin e nevojshëm.
- Më pas, grupit i duhet të mbledhë një minimum prej 20 për qind të nënshkrimeve të qytetarëve me të drejtë vote, me kërkesë për largim të kryetarit.
- Lista me nënshkrime duhet dërguar kryesuesit të kuvendit komunal, e cila më vonë përfundon në Komisionin Qendror Zgjedhor.
- Nëse KQZ-ja vlerëson se kushtet janë përmbushur, organizohen zgjedhjet për largimin e kryetarit.
- Nëse në ato zgjedhje sigurohen 50 për qind plus 1 votë për largim të kryetarit, ai largohet prej funksionit dhe organizohen zgjedhje të reja. Në rast të kundërt, iniciativa dështon. Ajo do të mund të përsëritej vetëm pas një viti.
Duke u bazuar në listën përfundimtare të votuesve për zgjedhjet e prillit, i bie që, për ta çuar peticionin përpara, në Mitrovicë të Veriut duhen 3.600 nënshkrime, në Leposaviq 2.600 nënshkrime, në Zveçan 1.400 nënshkrime dhe në Zubin Potok 1.300 nënshkrime.
Sipas Ligjit për vetëqeverisje lokale, zgjedhjet e parakohshme për kryetarë mund të mbahen në tri raste:
- nëse kryetari aktual jep dorëheqje
- nëse qytetarët kërkojnë shkarkimin e tij përmes peticionit, dhe
- nëse kryetari i komunës nuk paraqitet në vendin e punës më shumë se një muaj, pa arsye.