Lajmet

Talibanët ofrojnë armëpushim në këmbim të lirimit të të burgosurve

Të burgosurit talibanë pas lirimit nga burgu i Kandaharit, më 12 korrik, 2020. Vitin e kaluar, Qeveria afgane ka liruar më shumë se 5,000 të burgosur talibanë, për të ndihmuar fillimin e bisedimeve të paqes në Doha të Katarit.

Talibanët propozuan një armëpushim tremujtor në Afganistan, në këmbim të lirimit të 7,000 luftëtarëve të kapur, tha një zyrtar qeveritar.

Nader Nadery, negociator i Qeverisë afgane, tha se propozimi është “një kërkesë e madhe”.

Qeveria, deri më tani, nuk tregoi se si do të reagojë.

Përleshjet midis forcave qeveritare afgane dhe militantëve talibanë janë intensifikuar qëkur trupat ndërkombëtare kanë nisur tërheqjen zyrtare nga Afganistani, më 1 maj.

Talibanët kanë thënë së voni se luftëtarët e tyre kanë marrë nën kontroll 85 për qind të territorit afgan.

Kjo shifër kontestohet nga Qeveria dhe është e pamundur të verifikohet në mënyrë të pavarur.

SHIKONI EDHE: UNHCR: Afganistani është në prag të krizës humanitare

Të enjten, forcat afgane thanë se kanë rimarrë një vendkalim kufitar me Pakistanin, që ishte marrë nga talibanët.

Kryengritësit mohuan se kanë humbur kontrollin e pikës kufitare.

Nadery tha se udhëheqësit talibanë kanë kërkuar gjithashtu që emrat e tyre të hiqen nga një listë e zezë e Kombeve të Bashkuara.

SHIKONI EDHE: Gjenerali amerikan në Afganistan e dorëzon komandën