Kosova ka ndryshuar Planin Shtetëror të Vaksinimit kundër COVID-19 duke lejuar edhe personat nën 18 vjeç të imunizohen kundër sëmundjes.
Sipas vendimit të ri, u lejohet vaksinimi i personave mbi 16 vjeç me vaksinën Pfizer ndërsa për grupmoshën 12-15 vaksinimi “do të bëhet me prioritet dhe sipas indikacioneve shëndetësore”.
Sipas njoftimit, vendimi është bazuar në faktin se vaksina Pfizer-BioN/Tech është miratuar nga rregullatorët e BE-së dhe SHBA-së për vaksinimin e moshave mbi 12 vjeç.
Deri më tani në Kosovë të drejtë vaksinimi kanë pasur vetëm personat mbi 18 vjeç.
Që prej fundit të marsit 2021, kur Kosova nisi fushatën e vaksinimit, mbi 200 mijë persona janë vaksinuar me të dy dozat e vaksinës, ndërkaq numri i përgjithshëm i dozave të administruara është mbi 550 mijë.
SHIKONI EDHE: Të vaksinuarit po i mbijetojnë virusitNumri i rasteve të reja me COVID-19 në Kosovë ka shënuar rritje të ndjeshme që nga fundi i muajit korrik.
Të hënën (16 gusht) në Kosovë janë regjistruar dy raste të vdekjes nga koronavirusi i ri.
Viktimat janë nga Peja dhe Klina.
Sipas njoftimit të Ministrisë së Shëndetësisë, janë regjistruar edhe 740 persona të infektuar me koronavirusin e ri. Shifra është publikuar pas testimit të 5.646 mostrave.