Ka arritur në tre numri i viktimave nga koronavirusi në Maqedoninë e Veriut. Bëhet fjalë për Alije Mustafa, 66 vjeçe nga fshati Ballancë i Zhupës. Ajo ishte pacientja e parë e cila së bashku me bashkëshortin e saj ishte prekur me COVID-19 në Itali, ndërsa me virusin ishin identifikuar pas kthimit nga shteti italian.
“E ndjera një kohë të gjatë ishte në aparate të frymëmarrjes artificiale. Përkundër të gjitha përpjekjeve të mjekëve dhe infermiereve me terapi intensive, për fat të keq sot ajo ndërroi jetë. Ishte e moshës 66 vjeçe dhe në dosjen e saj mjekësore qëndron se ka pas marrë terapi kronike kundër tensionit të lartë”, deklaroi ministri i shëndetësisë, Venko Filipçe.
Gjatë 24 orëve të kaluara janë regjistruar edhe 29 raste të reja me COVID-19 duke e çuar numrin e të infektuarve në 177. Nga rastet e reja 20 janë regjistruar në Shkup, qytet i cili ka numrin më të lartë të të infektuarve. Tre raste të reja janë regjistruar edhe në Kumanovë, ku janë ndërmarrë masa shtesë nga frika e përhapjes së virusit.
SHIKONI EDHE: Shpallet gjendje e jashtëzakonshme në Maqedoninë e VeriutMinistria e Mbrojtjes njoftoi se dy pjesëtarë të ushtrisë kanë rezultuar pozitivë me koronavirus. Dy ushtarët, sipas ministrisë, ditëve të fundit kanë qenë në vetizolim pasi anëtarët e familjeve të tyre kanë dyshuar se ata kanë simptoma të COVID-19.
Ora policore në Maqedoni të Veriut
Qeveria të mërkurën miratoi vendimin për masa më rigoroze gjatë fundjavës. Ora policore do të vlejë nga ora 16:00 deri në ora 05:00 të mëngjesit. Rregullorja e re vlen vetëm për ditën e shtunë dhe të diel.
Për shkak të përhapjes së koronavirusit, autoritetet në Maqedoni të Veriut kanë shpallur gjendje të jashtëzakonshme.