Fëmijët që nuk vaksinohen, janë të cenueshëm nga koronavirusi, paralajmërojnë autoritetet shëndetësore në Kosovë.
Sipas të dhënave të Ministrisë së Shëndetësisë dërguar Radios Evropa e Lirë, numri i fëmijëve 12 deri në 17 vjeç, të vaksinuar me një ose dy doza të vaksinës, është rreth 45,000.
Nga numri i përgjithshëm i fëmijëve të kësaj grup-moshe, që sipas Agjencisë së Statistikave të Kosovës është mbi 160,000, i bie që rreth 28 për qind janë të vaksinuar.
Lexoni edhe këtë: Afro 400 fëmijë e të rinj të infektuar në dy ditëNë Ministrinë e Shëndetësisë thonë se hezitimi i prindërve për t’i vaksinuar fëmijët “është i pabazuar”.
Vaksina Pfizer/BioNTech për fëmijët 12-15 vjeç ka marrë dritën jeshile nga institucionet kryesore shëndetësore në botë.
Përpara vendimit, shkencëtarët kanë kryer prova klinike me mijëra fëmijë dhe nuk kanë raportuar asnjë shqetësim serioz për sigurinë.
Dhënia e vaksinës për grup-moshën 12-15 vjeç në Kosovë është miratuar në nëntor të vitit të kaluar.
Lexoni edhe këtë: Familja që riktheu sigurinë me anë të vaksinimit“Prindërit e fëmijëve të moshës 12 vjeç e lart duhet t'i vaksinojnë fëmijët pa asnjë rezervë, aq më tepër tani që [varianti] Omicron [i koronavirusit] prek edhe moshat e reja, siç janë nxënësit”, thuhet në një deklaratë të Ministrisë së Shëndetësisë në Kosovë, dërguar Radios Evropa e Lirë.
REL-i i ka kontaktuar disa prindër për të biseduar rreth zgjedhjes së tyre për të mos i vaksinuar fëmijët, por ata nuk kanë dashur të identifikohen.
Në kushte anonimiteti, disa kanë thënë se i frikësohen vaksinimit, për shkak të “efekteve negative” në të ardhmen.
Të tjerët kanë shprehur besimin se edhe në rast të infektimit, fëmijët do ta kalojnë lehtë.
Your browser doesn’t support HTML5
Pse duhet t'i vaksinoni fëmijët?
Që nga shpërthimi i pandemisë, në mars të vitit 2020, fëmijët kanë pasur shumë më pak gjasa se të rriturit që të sëmuren rëndë nga koronavirusi. Megjithatë, në Shtetet e Bashkuara dhe Mbretëri të Bashkuar, autoritetet shëndetësore kanë raportuar shifra rekorde të fëmijëve të hospitalizuar, si pasojë e variantit më ngjitës të koronavirusit, Omicron.
Ish-drejtori i Klinikës Infektive në Qendrën Klinike Univeristare të Kosovës, infektologu Hamdi Ramadani, thotë se vaksinimi u ofron mbrojtje fëmijëve.
“Prindërit duhet të mendojnë për shëndetin e fëmijëve të tyre dhe t’i vaksinojnë. Të dhënat e fundit tregojnë se numri i rasteve është i lartë. Është detyrë dhe obligim i prindërve t’i vaksinojnë ata”, thotë Ramadani për Radion Evropa e Lirë.
Nëse prindërit nuk i vaksinojnë fëmijët, shton ai, ata lejojnë që virusi të përhapet edhe më shumë.
Lexoni edhe këtë: Brenda repartit COVID-19 në Klinikën e PediatrisëBazuar në të dhënat e Ministrisë së Shëndetësisë në Kosovë, të publikuara më 20 janar, grup-mosha 10-19 vjeç ka qenë më e prekura nga koronavirusi.
Nga gjithsej 2,943 raste të reja, 899 kanë qenë të kësaj grup-moshe, ndërsa 181 të grup-moshës 0 deri në 9 vjeç.
“Sa më shumë persona të vaksinuar, aq më lehtë do të kalohet sëmundja edhe në rast të infektimit”, thotë Ramadani.
Thirrje të ngjashme bën edhe drejtoresha e Klinikës së Pediatrisë në Qendrën Klinike Universitare të Kosovës, Violeta Grajçevci.
“Prindërit duhet t’i vaksinojnë fëmijët mbi moshën 12-vjeçare, nuk duhet hezituar. Këtë e rekomandon edhe Organizata Botërore e Shëndetësisë”, thotë ajo.
Lexoni edhe këtë: OBSH: Pandemia nuk është as afër funditSipas OBSH-së, vaksinimi i fëmijëve kundër koronavirusit është i domosdoshëm në luftën kundër pandemisë. Vaksinat, sipas studimeve, ndikojnë në rritjen e imunitetit ndaj virusit dhe evitimin e hospitalizimit dhe pasojave të rënda nga ky virus.
Në Shtetet e Bashkuara dhe në disa vende të tjera është miratuar vaksinimi edhe i fëmijëve 5-11 vjeç.
Sipas Qendrave për Kontrollin dhe Parandalimin e Sëmundjeve në SHBA (CDC), fëmijët kanë gjasa aq sa të rriturit për t’u infektuar me koronavirus. Ata po ashtu mund të sëmuren rëndë dhe të kenë pasoja afatshkurtra ose afatgjata.
Lexoni edhe këtë: Të vaksinuarit ia dalin më lehtë me Omicronin“Fëmijët që infektohen me koronavirus mund të kenë gjithashtu komplikime serioze, si sindroma inflamatore e shumë sistemeve (MIS-C) - një gjendje ku pjesë të ndryshme të trupit inflamohen, duke përfshirë zemrën, mushkëritë, veshkat, trurin, lëkurën, sytë ose organet gastrointestinale”, thotë CDC-ja.
Vaksinimi mund të ndihmojë që fëmijët të mos sëmuren rëndë edhe nëse e kapin koronavirusin, thekson CDC-ja.
Sipas CDC-së, vaksina Pfizer/BioNTech mund të shkaktojë efekte të përkohshme anësore, si lodhje, dhimbje koke, dhimbje muskujsh apo ethe dhe ato mund të zgjasin deri në 48 orë.
CDC-ja thotë se vaksinimi i fëmijëve mund të ndihmojë në mbrojtjen e anëtarëve të familjes, duke përfshirë vëllezërit dhe motrat që nuk kualifikohen për vaksinim dhe anëtarët e familjes që mund të jenë në rrezik më të lartë.