Vendi ku u konfiskua një sasi e konsiderueshme e drogës

Një sasi e konsiderueshme e drogës, e llojit kokainë, dyshohet se është konfiskuar të hënën në një objekt komercial në Lipjan. Droga dyshohet se u gjet në një kamion që kishte hyrë nga Shqipëria, e më të cilin po transportohej mish. Aksionin e konfirmoi ministri i Punëve të Brendshme Xhelal Sveçla duke mos dhënë detaje për sasinë dhe destinacionin e drogës. Deri më tani nuk ka informacione zyrtare, por siç raportohet, bëhet fjalë për rreth 400 kilogramë drogë të llojit kokainë. Përveç Policisë së Kosovës në aksion të përfshirë kanë qenë edhe institucionet e Shqipërisë dhe Italisë. Deri më tani nuk dihet numri i personave të arrestuar.