Zgjedhja që bëri Joe Biden, për kandidaten për nënpresidente të Shteteve të Bashkuara, senatoren Kamala Harris, ka qenë një vendim i pashmangshëm.
Kamala Harris, e cila pritet të bëhet nënpresidentja e parë amerikane me ngjyrë, ka thënë se këto zgjedhje kanë qenë më të rëndësishme sesa fitorja e Bidenit dhe e saj.
“Ka të bëjë me shpirtin e Amerikës dhe gatishmërinë tonë për të luftuar për të. Ne kemi shumë punë përpara nesh. Le të fillojmë”.
Harris, që garoi kundër Bidenit gjatë garës brenda Partisë Demokrate, kritikoi ashpër qëndrimin e tij për transportin e fëmijëve nga komunitetet minoritare në shkollat e fëmijëve të bardhë, që u shndërrua në një nga momentet më virale të debateve të demokratëve për zgjedhjet presidenciale të vitit 2020.
SHIKONI EDHE: Joe Biden, presidenti i 46-të i Shteteve të BashkuaraTeksa ka qenë senator nga Dellauer në vitet e 70-ta, Biden kishte kundërshtuar këtë lloj politike, e cila kishte për qëllim të sillte diversitet në shkollat publike, duke e quajtur atë si një “koncept të pakuptimtë”.
“Ka qenë një vajzë e vogël nga Kalifornia, e cila ishte në klasë të dytë në një shkollë të integruar publike, dhe ajo shkonte në shkollë me autobus çdo ditë. Ajo vajzë e vogël isha unë”, iu drejtua Harris – e cila është grua me ngjyrë– Bidenit gjatë një debati të mbajtur në qershor të vitit 2019.
Joe Biden dhe Kamala Harris gjatë një debati të demokratëve.
Përkundër kësaj, Biden e zgjodhi Harris për postin e nënpresidentes dhe ai tha se për këtë post dëshironte të zgjidhte një grua, duke bërë që Harris të bëhej gruaja e parë me ngjyrë si kandidate për nënpresidente amerikane.
Harris, 56 vjeçe, ish-prokurore e Përgjithshme e Kalifornisë ka mbështetur shumë politika të favorizuara nga krahu më i moderuar i Partisë Demokrate që Biden përfaqëson, edhe pse historiku i saj për disa çështje që kanë të bëjnë me krimet dhe çështjet e drogës kanë zemëruar personat me pikëpamje më të moderuara dhe liberale.
Prejardhja e saj e përzier etnike i ka shkuar Harrisit në favor. Çështja e racizmit ishte një nga temat që dominuan fushatën e vitit 2020, pas vdekjes së një personi në ngjyrë teksa po arrestohej nga policia në Minesota – ngjarje kjo që nxiti protesta mbarëkombëtare dhe thirrje që të bëhen reforma në sektorin e sigurisë.
Pozita e nënpresidentes, i jep një shtysë Kamala Harris për një nominim për presidente nga partia e saj për zgjedhjet e vitit 2024, nëse Biden – i cili këtë muaj mbush 78 vjet – nuk do të dëshirojë që të kandidojë edhe për një mandat të dytë presidencial. Biden, tashmë është bërë personi më i vjetër që është zgjedhur ndonjëherë president i Shteteve të Bashkuara.
Vajza e imigrantëve
Kamala Devi Harris u lind më 20 tetor, 1964, në një familje të shkolluar në Okland të Kalifornisë, në kohën kur kishte trazira racore në Shtetet e Bashkuara.
Nëna e saj, Shyamala Gopalan, ishte një biologe që kishte emigruar në SHBA për të studiuar në Universitetin prestigjioz të Kalifornisë, Berkeley.
Babai i saj, Donald Harris, u shpërngul në Kalifornia nga Xhamajka më 1961 për të studiuar ekonomi në Universitetin Berkeley dhe më pas u bë profesor në Universitetin Stanford, një tjetër universitet prestigjioz amerikan.
Ata u takuan si aktivistë për të drejtat civile në Berkeley, universitet që njihet për aktivizëm politik. Ata pas disa vjetësh patën vajzën e tyre të dytë Maya, para se të divorcoheshin. Harris, kur ishte fëmijë shkonte në shkollë me autobus në një lagje të banuar nga të bardhët në Kaliforni dhe më pas ajo u zhvendos në Kubek të Kanadasë, ku jetoi me nënën dhe motrën e saj.
*Video nga arkivi
Your browser doesn’t support HTML5
Kush është kandidatja demokrate për nënpresidente të SHBA-së?
Harris u rikthye në Shtetet e Bashkuara për të vijuar studimet në Universitetin Howard, një institucion i ndjekur nga personat me ngjyrë në Uashington. Aty, ajo kreu studimet për ekonomi dhe shkenca politike. Më pas, ajo shkoi në Universitetin e Kalifornisë, ku më 1989 diplomoi për juridik.
Shumë shpejt, Harris bëri emër në komunitetin e drejtësisë në Kaliforni, ku më 2003 u zgjodh prokurore e qarkut të San Franciskos. Një vit më vonë ajo u përball me zemërimin e forcave të sigurisë, pasi ajo refuzoi që të kërkonte dënim me vdekje për një anëtar të një bande, i akuzuar për vrasjen e një zyrtari policor.
Gjatë shtatë vjetëve të punës si prokurore në San Francisko, nga 2004 deri më 2011, Harris tregoi se është e ashpër në veprat kriminale, duke bërë që të rriten niveli i të burgosurve për krime të lidhura me drogën dhe krime të tjera të rënda.
Ashpërsia e saj e treguar për rastet kriminale i ndihmoi asaj që të zgjidhej prokurore e Përgjithshme e Kalifornisë më 2010. Nga kjo pozitë, ajo mbikëqyri punën e rreth 5,000 avokatëve.
Njëri nga kundërshtarët e saj demokrat, përfaqësuesi Tulsi Gabbard, e ka kritikuar Harris për numrin e madh të njerëzve që ka dënuar me burg për posedim të marihuanës gjatë punës së saj në Kaliforni, teksa vetë Harris ka pranuar se e ka provuar marihuanën.
Që atëherë, përdorimi i marihuanës për rekreacion është legalizuar në Kaliforni. Pasi fillimisht kishte kundërshtuar këtë gjë, Harris më pas u bë mbështetëse e dekriminalizimit të kanabisit, që është bërë një element kyç në thirrjet e saj për reformë kombëtare në sistemin e drejtësisë.
Kundërshtarët
Gjashtë vjetët si prokurore e Përgjithshme në shtetin me popullsinë më të madhe në vend, u përshkuan me trazira racore të nxitura nga të shtënat e policisë më 2013 dhe 2014. Këto ngjarje, çuan në thirrje për reforma.
Harris kërkoi që forcat e rendit në Kaliforni të kryenin trajnime, por refuzoi që ta bënte të detyrueshme që ata gjatë punës së tyre të kishin kamera të vendosura në trup, të cilat mund të ndihmojnë në qartësimin e situatave kur ka mëdyshje nëse zyrtarët policorë kanë përdorur më shumë dhunë se sa ka qenë e nevojshme.
Një mbështetës mban në duar një fotografi të Bidenit dhe Harrisit.
Ajo gjithashtu nxiti zemërim në mesin e progresistëve kur nuk mbështeti një legjislacion që do të kërkonte që zyra e saj të hetonte rastet kur zyrtarët policorë kanë shtënë me armë gjatë punës së tyre.
Gjatë të shtënave në Minesota në maj të vitit 2020, Harris tentoi të balanconte pozicionin e saj në çështjen mjaft përçarëse sa i përket reformës për forcat e rendit, duke thënë se shteti ka nevojë të “riimagjinojë” sigurinë publike, por ajo nuk i mbështeti në mënyrë eksplicite thirrjet e disa elementeve më progresiste në Partinë Demokrate, që të shkurtohej buxheti për policinë.
Bërja e pyetjeve të vështira
Harris u zgjodh anëtare e Senatit amerikan në nëntor të vitit 2016, duke u bërë gruaja e dytë me ngjyrë në historinë amerikane që fitoi ulëse në Dhomën e Lartë të Kongresit.
Ajo u bë e njohur për pyetjet e vështira që i parashtroi anëtarëve të kabinetit të presidentit Donald Trump. Ndër ngjarjet më të famshme në këtë drejtim janë pyetjet e vështira që ajo i bëri prokurorëve të Përgjithshëm, Jeff Sessions dhe William Barr gjatë paraqitjeve të tyre para Senatit, por edhe ndaj Brett Kavanaugh, në kohën kur ai ishte i nominuar për Gjykatën Supreme.
Kamala Harris duke i bërë pyetje prokurorit të Përgjithshëm, William Barr gjatë dëshmisë së tij pranë Komitetit të Drejtësisë në Senatin amerikan.
Republikanët kanë tentuar që ta cilësojnë Harrisin si anëtare “radikale” të Partisë Demokrate, në përpjekje që të fitojnë më shumë mbështetje në mesin e votuesve të moderuar dhe atyre të pavarur. Ata kanë vënë në pah kundërshtimin që ajo i ka bërë “fracking”, një metode kundërthënëse e nxjerrjes së naftës dhe gazit natyror, ku përfshihet injektimi i lëndëve në tokë. Republikanët po ashtu kanë pretenduar – pa dhënë dëshmi – se Harris, jo Biden, do të jetë ajo që do të udhëheqë në Shtëpinë e Bardhë, pasi kanë vënë në pikëpyetje kapacitetet mendore të Bidenit. Edhe për këto pretendime, ata nuk kanë dhënë asnjë dëshmi.
Sidoqoftë, nuk do të ishte e habitshme që Harris të fitonte nominimin e demokratëve për zgjedhjet presidenciale të vitit 2024 nëse Biden nuk do të kërkonte një mandat të dytë presidencial.
Që prej viteve të 50-ta, pesë nënpresident fituan nominimin e partive të tyre për të garuar për president, përfshirë Richard Nixon, Walter Mondale, George H. W. Bush, Al Gore dhe Joe Biden. Nixon, Bush dhe Biden dolën fitues në garat e tyre presidenciale.
Që prej vitit 2014, Harris është e martuar me avokatin Douglas Emhoff, i cili ka një djalë dhe një vajzë nga një martesë e mëhershme.