Izraeli ka kryer një sulm masiv ndaj asaj që tha se është selia qendrore e Hezbollahut - që është grup militant dhe parti politike që kontrollon shumicën e Libanit jugor – në periferi të Bejrutit, teksa një televizion izraelit tha se lideri i grupit, Hassan Nasrallah, ishte caku i sulmit. Sulmi ndodhi pak pasi kryeministri izraelit, Benjamin Netanyahu, paralajmëroi në Kombet e Bashkuara se veprimet ndaj organizatës, të shpallur terroriste, nuk do të ndalen.
Zëdhënësi i ushtrisë izraelite, Daniel Hagari, tha më 27 shtator se forcat izraelite shënjestruan selinë kryesore të Hezbollahut, që gjendet në mesin e ndërtesave të banimit, pas raportimeve për shpërthime të mëdha dhe zjarr në atë zonë.
"Disa minuta më parë, Forcat e Mbrojtjes të Izraelit kryen sulme precize në selinë qendrore të organizatës terroriste Hezbollah... duke ndërmarrë veprim të nevojshëm për të mbrojtur popullin tonë, në mënyrë që familjet izraelite të mund të jetojnë të sigurt në shtëpitë e tyre".
Ushtria izraelite më pas tha se ka kryer sulme të mëtejme ndaj Hezbollahut, pas sulmeve fillestare në selinë e grupit, duke shtuar se po vazhdon të "degradojë dhe shkatërrojë" aftësitë e Hezbollahut.
Ka spekulime lidhur me vendndodhjen e Nasrallahut dhe gjendjen e tij pas sulmit, edhe pse ende nuk ka informacione zyrtare për të.
Ushtria izraelite nuk ka konfimuar se Nasrallah ishte cak i sulmit të tyre.
Një zyrtar i lartë izraelit tha për Reuters se "është herët" të thuhet nëse Nasrallah është goditur gjatë sulmit.
Ky zyrtar tha se "shpreson" që Izraelit nuk do t'i duhet të kryejë operacion tokësor në Liban, por nuk e përjashtoi një mundësi të tillë.
SHIKONI EDHE: Izraeli thotë se po përgatitet për një operacion të mundshëm tokësor në LibanI udhëhequr nga Nasrallahu, Hezbollahu – që mbështetet nga Irani – ka zhvilluar raporte të ngushta edhe me bashkëpunëtorët e tjerë dhe grupet e tjera të armatosura që mbështeten nga Teherani, duke iu ndihmuar në trajnimin e luftëtarëve.
Televizioni Al-Manar, që udhëhiqet nga Hezbollahu, tha se të paktën katër ndërtesa ishin shkatërruar gjatë sulmit, duke raportuar për numër të madh të viktimave. Ministria libaneze e Shëndetësisë tha se dy persona janë vrarë dhe më shumë se 70 të tjerë janë plagosur.
Lideri i Hezbollahut, Hassan Nasrallah. Fotografi nga arkivi.
Në videot e publikuara në internet është parë shkatërrim i madh.
Shahan Kandaharian, kryeredaktor i të përditshmes në gjuhën armene, Azdak, në Bejrut, tha se kishte dëgjuar shpërthime të fuqishme.
"Mësuam se ishte një sulm ajror në selinë e Hezbollahut, që gjendet në periferi, në jug të Bejrutit", tha ai për Radion Evropa e Lirë.
"I gjithë qyteti po dridhej. Isha në zyrë dhe mund të dëgjoheshin shumë qartë shpërthimet. Dëgjova dhjetë shpërthime të njëpasnjëshme", shtoi ai, duke theksuar se "ishte një sulm i rëndë ajror".
Zëdhënësja e Pentagonit, Sabrina Singh, tha se Shtetet e Bashkuara nuk kanë qenë të njoftuara paraprakisht për sulmin e Izraelit.
“SHBA-ja nuk ka qenë e përfshirë në këtë operacion dhe ne nuk kemi pasur paralajmërim paraprak”, tha ajo për gazetarët.
Më herët, Netanyahu lëshoi një paralajmërim të fuqishëm ndaj Iranit gjatë adresimit të tij në Asamblenë e Përgjithshme të Kombeve të Bashkuara më 27 shtator, duke thënë se “nuk ka vend” në Iran, që Izraeli nuk mund të arrijë nëse Republika Islamike vazhdon të tentojë ta sulmojë Izraelin.
Ai tha po ashtu se "ne do të vazhdojmë ta degradojmë Hezbollahun, derisa të arrijmë qëllimet tona".
Teksa kryeministri izraelit nisi fjalimin e tij, disa delegacione – përfshirë atë të Iranit – u larguan nga mbledhja në OKB në shenjë proteste, ndërsa shumë nga të pranishmit në sallë ose duartrokitën ose brohoritën me zemërim.
SHIKONI EDHE:
"I shtrëngojmë duart dhe lutemi": Jeta në Liban mes sulmeve intensive izraeliteSulmet vdekjeprurëse izraelite në Liban shënojnë nisjen e një lufte të rePas Netanyahut, në OKB folën përfaqësuesit e Sllovenisë dhe Pakistanit, të cilët i bën thirrje udhëheqësit izraelit të ndalë luftën në Rripin e Gazës kundër Hamasit, grupit palestinez të shpallur organizatë terroriste nga Shtetet e Bashkuara dhe Bashkimi Evropian.
Ai tha se nuk kishte planifikuar të mbante fjalim këtë vit në OKB, por pasi kishte dëgjuar “gënjeshtra ndaj shtetit tim nga shumë folës në këtë podium, vendosa të vij këtu dhe të tregoj të vërtetën”.
Netanyahu më pas u përqendrua te Irani, të cilin e fajësoi për “organizimin” e shpërthimit të dhunës aktuale në Lindjen e Mesme.
“Kam një mesazh për tiranët e Teheranit: Nëse na godisni, ne do t’iu godasim. Nuk ka asnjë vend në Iran që dora e gjatë e Izraelit nuk mund ta arrijë, dhe kjo është e vërtetë për mbarë Lindjen e Mesme”, tha Netanyahu.
Ai kërkoi që Këshilli i Sigurimit i OKB-së të vendosë sanksione ndaj Teheranit, në mënyrë që Irani të mos sigurojë armë bërthamore, duke shtuar se Izraeli do të bëjë “gjithçka që ka në dorë” që një gjë e tillë të mos ndodhë.
Netanyahu e mbajti këtë fjalim pas një përpjekjeje diplomatike nga SHBA-ja, Franca dhe aleatët e tjerë perëndimorë, të cilët po kërkojnë një armëpushim 21-ditor përgjatë kufirit mes Izraelit dhe Libanit, teksa bombardimet izraelite ndaj Hezbollahut – që mbështetet nga Irani – janë intensifikuar gjatë kësaj jave.
SHIKONI EDHE: Netanyahu thotë se Izraeli do t’i vazhdojë bisedimet për armëpushim në LibanHezbollahu, që Izraeli thotë se ka gjuajtur qindra raketa në territorin e tij gjatë këtij viti, është shpallur organizatë terroriste nga SHBA-ja, ndërkaq BE-ja e ka sanksionuar krahun e tij të armatosur, por jo edhe partinë Hezbollah, që ka ulëse në Parlamentin libanez.
Më 27 shtator, Izraeli tha se shënjstroi selinë e Hezbollahut në jug të Bejrutit, pas raportimeve se kishte pasur shpërthime në atë zonë.
Luftimet, që janë intensifikuar, kanë vrarë qindra persona, sipas zyrtarëve shëndetësorë libanezë, teksa dhjetëra mijëra të tjerë janë zhvendosur.
Nga frika se konflikti do të përhapet në mbarë Lindjen e Mesme, Uashingtoni ka paralajmëruar se çdo përshkallëzim do ta bënte edhe më të vështirë për civilët nga të dyja palët që të kthehen në shtëpitë e tyre.