Rrahje mes deputetëve në Kuvendin e Serbisë

Përleshjet dhe shtyrjet mes përfaqësuesve të pushtetit dhe atyre të opozitës kanë shënuar seancën e Kuvendit të Serbisë më 25 nëntor.

Në incident, përveç deputetëve, janë përfshirë edhe ministra të Qeverisë, duke e detyruar sigurimin e Kuvendit të ndërhyrë për t’i ndarë ata.

Pas përleshjeve, seanca vazhdoi me kryetaren e Kuvendit, Ana Bërnabiq, që e përmbylli diskutimin për secilën nga më shumë se 60 pikat e rendit të ditës.

Ndër to, më i rëndësishmi ishte propozim-buxheti për vitin 2025.

Bërnabiq, e rrethuar nga sigurimi parlamentar, e lexoi agjendën pikë për pikë dhe e mbylli diskutimin, pa pasur fare diskutim, sepse asnjë nga deputetët nuk e kërkoi fjalën.

Gjatë asaj kohe, deputetët e opozitës ia ndërprenë fjalimin asaj duke i rënë bilbilave dhe vuvuzelave.

SHIKONI EDHE: Arrestohen 11 persona në lidhje me tragjedinë në stacionin hekurudhor në Novi Sad

Deputetët opozitarë më herët kishin kërkuar që Kuvendi, në të cilin po diskutohej për buxhetin, të votojë për mosbesimin e Qeverisë pas aksidentit në Novi Sad, ku humbën jetën 15 persona. Megjithatë, pushteti e refuzoi atë propozim.

Gjatë transmetimit të seancës parlamentare nuk u pa qartë se si filloi incidenti, ndërsa zëri ishte i fikur, prandaj nuk mund të dëgjohej se çfarë po i thoshin deputetët njëri-tjetrit.

U pa që deputetët e pushtetit dhe të opozitës po ndaheshin nga sigurimi i Kuvendit, ndërkohë që goditeshin, tërhiqeshin, shtyheshin, lageshin me ujë dhe qëllonin njëri-tjetrin.

Çfarë tha kryetarja e Kuvendit?

Kryetarja e Kuvendit, Ana Bërnabiq, pas incidenteve e akuzoi opozitën për "përpjekje për uzurpim të dhunshëm të pushtetit".

Ajo akuzoi deputetët opozitarë se, pas ndërprerjes së seancës, "shkulën mikrofonat" dhe "thyen ekranin" për të "penguar" vazhdimin e saj.

Shtyrje e grushte në Kuvendin e Serbisë

"Kështu duket liria e fjalës sipas interpretimit të tyre", deklaroi Bërnabiq në një konferencë për media në hollin e Kuvendit, ndërsa deputetët opozitarë frynin bilbila dhe vuvuzela.

Bërnabiq u shfaq para gazetarëve e shoqëruar nga deputetët e shumicës qeveritare, ndërsa rreth saj dhe mediave qëndronte sigurimi i Kuvendit. Pas sigurimit ndodheshin deputetët e opozitës.

Ajo tha se seanca kishte nisur me një minutë heshtje për viktimat e aksidentit në Stacionin Hekurudhor të Novi Sadit më 1 nëntor dhe se seanca duhej të ishte dinjitoze.

"Për fat të keq, kjo është gjithçka përveç nderimit dinjitoz për të ndjerët dhe familjet e tyre", tha Bërnabiq.

Për incidentet në Kuvend ka reaguar edhe presidenti serb Aleksandar Vuçiq.

“Pavarësisht se jam i shqetësuar për sjelljet e egra të disa deputetëve në Kuvendin Kombëtar, bullizmin e përditshëm që ata kryejnë në të gjithë vendin tonë, dua t'i qetësoj qytetarët dhe t'u them se do t'i përgjigjemi arrogancës, vrazhdësisë dhe sjelljes së tyre të keqe me punë edhe më të madhe në të ardhmen”, shkroi Vuçiq në Instagram.

Çfarë thonë deputetët opozitarë?

Deputeti i Frontit të Gjelbër e të majtë, Radomir Llazoviq, deklaroi për televizionin N1 se incidentet nisën pasi ai tentoi të ngjiste një ngjitëse me mesazhin "Duart tuaja janë të përgjakura" pranë vendeve të ministrave në sallën e Kuvendit.

Ky është një slogan proteste, pasi javët e fundit është kërkuar përgjegjësi politike dhe penale për aksidentin në Novi Sad.

Ai tha se pas kësaj, atë e "sulmoi" ministri i Shëndetësisë, Zllatibor Llonçar, dhe pas një shtyrjeje me të, siç pretendon Llazoviq, ndodhi "përleshja e përgjithshme" në sallën e Kuvendit.

"Ne u përpoqëm ta qetësonim situatën, por na sulmuan gjatë gjithë kohës, policia dhe Partia Progresive Serbe bashkë", tha Llazoviq. Ai shtoi se disa deputetë ishin lënduar.

Pamje nga incidenti mes deputetëve në Kuvendin e Serbisë.

Lidhur me incidentet që ndodhën në Kuvend, ka reaguar edhe presidenti i Serbisë, Aleksandar Vuçiq.

"Pavarësisht faktit që jam i shqetësuar për sjelljen e egër të një pjese të deputetëve në Kuvendin Popullor, për dhunën e përditshme që ata ushtrojnë në mbarë vendin tonë, dua t’i qetësoj qytetarët dhe t’u them se ndaj sjelljes së tyre të pahijshme, mungesës së edukatës dhe arrogancës, do të përgjigjemi edhe me më shumë punë në të ardhmen", tha Vuçiq në një video në Instagram.

Kur nisën incidentet?

Incidentet filluan rreth orës 12:30, pasi kryeministri i Serbisë, Millosh Vuçeviq, dhe ministrat e Qeverisë hynë në sallën e Kuvendit.

Ata morën pjesë në seancë pasi në rendin e ditës ishte propozimi i buxhetit për vitin 2025, të cilin duhej ta prezantonte Vuçeviq.

Deputetët opozitarë, pasi Vuçeviq dhe ministrat hynë në sallë, ngritën fletë ku shkruhej "Korrupsioni vret" dhe "Duart tuaja janë të përgjakura", dhe duke bërtitur "Vrasës".

Opozita kërkon shkarkimin e kryeministrit Milosh Vuçeviq dhe përcaktimin e përgjegjësisë politike dhe penale për aksidentin.

Deputetët duke u përleshur gjatë sesionit të së hënës në Kuvendin e Serbisë, Beograd, 25 nëntor 2024.

Deputetët opozitarë shfaqën gjithashtu një transparent me portretin e presidentit të Serbisë, Aleksandar Vuçiq, ku duart e tij ishin të ngjyrosura me të kuqe.

Nsaj kësaj reaguan deputetët e pushtetit duke ngritur fletë ku shkruhej: "Korrupsioni dhe hajnia janë emri juaj i mesëm".

Një pjesë e deputetëve opozitarë më pas tentoi të afrohej te pjesa e sallës ku qëndrojnë ministrat e Qeverisë. Nuk mund të dëgjohej se çfarë po thoshin mes tyre.

Pas kësaj, kryeparlamentarja thirri sigurimin e Kuvendit që të ndërhynte. Ajo kërkoi nga deputetët të ktheheshin në vendet e tyre.

"Kjo është e turpshme për këtë institucion", tha ajo.

Incident pati edhe në ballkonin e sallës parlamentare, ku gjithashtu ndërhyri sigurimi i Kuvendit.

Para se të caktohej pauza, kryeministri i Serbisë, Millosh Vuçeviq, me ftesë të kryetares së Kuvendit, filloi prezantimin e propozimit për buxhetin.

Fjalimi i tij u ndërpre nga opozita, e cila frynte bilbila dhe vuvuzela. Ndërsa Vuçeviq fliste, deputetët opozitarë qëndronin rreth tij dhe ministrave, duke mbajtur parulla me mbishkrimin "Duart tuaja janë të përgjakura."

Kryetarja e Kuvendit, Ana Bërnabiq, ndërpreu seancën, por incidentet në sallë vazhduan edhe pasi ajo caktoi një pauzë.