Gjermania ka thënë të enjten se do të ndalë mbështetjen financiare për Afganistanin, në rast se talibanët marrin pushtetin.
Duke folur për transmetuesin gjerman, ZDF, ministri i Jashtëm gjerman, Heiko Maas, ka thënë se talibanët e dinë se Afganistani nuk mund të mbijetojë pa ndihmën ndërkombëtare.
“Ne nuk do të dërgojmë asnjë cent për këtë shtet, nëse talibanët marrin plotësisht kontrollin, zbatojnë Ligjin e Sheriatit dhe e kthejnë vendin në kalifat”, ka thënë Maas.
Gjermania dërgon rreth 430 milionë euro si ndihmë për Afganistanin brenda një viti, dhe është një nga donatoret më të mëdha.
Prej kur trupat ndërkombëtare kanë nisur të tërhiqen nga Afganistani në muajin maj, talibanët kanë marrë kontrollin e një pjese të konsiderueshme të territorit.
SHIKONI EDHE: Talibanët po i afrohen kryeqytetit afganUshtarët gjermanë kanë qenë të angazhuar në kuadër të forcave të NATO-s, për gati 20 vjet në Afganistan.
Duke folur për radion Deutschlandfunk, ministrja gjermane e Mbrojtjes, Annegret Kramp-Karrenbauer, ka konfirmuar se afganët që kanë punuar me forcat gjermane, do të dërgohen në Gjermani, për t’u mbrojtur nga hakmarrja e talibanëve.
“Ekziston përkushtim për t’i larguar nga aty”, ka thënë Kramp-Karrenbauer, duke përmendur se në këtë proces kanë dalë disa pengesa.
Autoritetet lokale lejojnë largimin e shtetasve afganë nga shteti, vetëm nëse kanë pasaportë, dhe një pjesë e madhe nuk e kanë këtë dokument.
“Pa këtë dokument udhëtimi, njerëzit nuk mund të nisen drejt aeroportit”, ka thënë Kramp-Karrenbauer.
I pyetur për zgjerimin e territorit të talibanëve, Maas ka përmendur vendimin e Shteteve të Bashkuara për t’u tërhequr nga ky vend.
“Kjo ka nënkuptuar se të gjitha trupat e NATO-s është dashur të tërhiqen po ashtu, sepse pa kapacitetet amerikane, asnjë shtet nuk mund të dërgojë ushtarët e vet atje në mënyrë të sigurt”, ka thënë mes tjerash Maas.
SHIKONI EDHE: SHBA: U takon afganëve ta mbrojnë shtetin e tyreForcat e udhëhequra nga Shtetet e Bashkuara kanë rrëzuar talibanët nga pushteti në tetor të vitit 2001.
Talibanët kanë qenë duke strehuar atëbotë Osama Bin Laden dhe figura tjera të Al-Kaidës, të lidhura me sulmet e 11 shtatorit të po atij viti në Shtetet e Bashkaura.
Presidenti amerikan Joe Biden ka thënë se tërheqja amerikane tani është e arsyeshme, pasi forcat amerikane janë siguruar që Afganistani nuk do të bëhet më bazë për xhihadistë të huaj që të kryejnë komplote kundër Perëndimit.