Boris Johnson, politikani që ka premtuar se do të largojë Britaninë e Madhe nga Bashkimi Evropian me apo pa marrëveshje më 31 tetor, do të zëvendësojë Theresa May-n në rolin e kryeministrit, pasi ka fituar garën për të parin e Partisë Konservatore në Britani, ditën e martë.
Fitorja e tij rrezikon që të bllokojë procesin e Brexitit, pasi ligjvënësit britanikë janë zotuar se do të rrëzojnë secilën qeveri që tenton të largojë Britaninë nga blloku evropian pa një marrëveshje.
SHIKONI EDHE: BE këmbëngul: S'ka negociata të reja për BrexitJohnson, i konsideruar si fytyra e referendumit të vitit 2016 për Brexit, ka fituar votat e 92,153 anëtarëve të Partisë Konservatore, në krahasim me 46,656 sa ka fituar rivali i tij, Sekretari i Jashtëm britanik, Jeremy Hunt.
May do të largohet nga zyra kryeministrore ditën e mërkurë, pasi të takojë Mbretëreshën Elizabetë në Pallatin Buckingham.
“Nder i jashtëzakonshëm”
Kryeministri i ri britanik ka përshëndetur rivalin, Jeremy Hunt duke thënë se ai ka “ide të mrekullueshme” të cilat ka premtuar se do t’i huazojë.
Boris Johnson (majtas) dhe Sekretari i Jashtëm britanik, Jeremy Hunt.
Për të, kjo fitore përbën “nder të jashtëzakonshëm”.
Ai po ashtu ka falënderuar edhe kryeministren në shkuarje për shërbimin e saj ndaj shtetit.
Sipas tij ka qenë privilegj që ka shërbyer në kabinetin e May-t, sepse ka parë pasion dhe vendosshmëri gjatë udhëheqësisë së saj.
Theresa May, ka njoftuar se më 7 qershor se do të largohet nga pozita e lideres së Partisë Konservatore në Britani, duke i hapur rrugën procesit të zgjedhjes së kryeministrit të ri.
May është përballur me presion të madh nga partia e saj për t’u larguar nga pozita që ka, pasi plani i saj për largim të Britanisë nga Bashkimi Evropian ka dështuar të miratohet në Parlamentin britanik.
SHIKONI EDHE: Kryeministrja britanike përlotet në fjalimin e dorëheqjesPak minuta pas fitores së Johnsonit, lideri opozitar në Britani, Jeremy Corbyn ka thënë përmes një postimi në rrjetin social, Twitter se Johnson nuk e ka fituar mbështetjen nga shteti.
“Boris Johnson ka fituar mbështetjen e më pak se 100,000 anëtarëve jopërfaqësues të Partisë Konservatore, duke premtuar ulje të taksave për të pasurit, duke e prezantuar veten si mik të bankierëve dhe duke shtyrë përpara procesin dëmtues të Brexitit pa marrëveshje. Por ai nuk ka fituar mbështetjen e shtetit”, është shprehur ai.
Reagimet pas fitores së Johnson-it
Presidenti amerikan Donald Trump ka përgëzuar Johnsonin për fitoren e tij.
“Urime Boris Johnsonit në pozitën e re si kryeministër i Mbretërisë së Bashkuar. Ai do të jetë i mrekullueshëm!” ka thënë Trump në një postim në Twitter.
Ministrja e parë e Skocisë, Nicola Sturgeon, ka thënë se ajo është “thellësisht e shqetësuar” pas fitores së Johnsonit.
“Unë e përgëzoj Boris Johnsonin për fitoren e tij si lider i konservatorëve dhe do të bëjë gjithçka që është e mundur për të siguruar se ai respekton qëndrimet dhe interesat e Skocisë. Megjithatë jam thellësisht e shqetësuar rreth koncepteve të udhëheqësisë së tij, andaj do të ishte e pasinqertë nga ana ime nëse nuk do të isha e sinqertë për këtë”.
Ministrja e parë skoceze, Nicola Sturgeon.
Britania pritet të largohet nga BE-ja më 31 tetor të këtij viti, mirëpo fillimisht parlamenti në Mbretërinë e Bashkuar duhet të miratojë kushtet e largimit.
Vendimi për Brexit ka ardhur pasi 52 për qind e votuesve kanë votuar për dalje të Britanisë nga BE-ja kundruall 48 për qind që kanë kundërshtuar atë, në referendumin e mbajtur më 2016.