Të burgosurit politikë në Bjellorusi janë në gjendje shumë të rëndë, thotë IGMF

Shoqata Ndërkombëtare për të Drejtat e Njeriut (IGFM) tha të premten se gjendja e të burgosurve politikë në Bjellorusi është shumë e rëndë.

Kjo shoqatë kërkoi që mjekë të pavarur ta vizitojnë anëtaren e burgosur të opozitës, Maria Kolesnikova.

Opozitarja 40-vjeçare, një nga emrat më të njohur të opozitës bjelloruse, është dënuar me 11 vjet burgim në shtator të vitit 2021.

Sipas IGFM-së, në Bjellorusi janë aktualisht rreth 1.400 të burgosur politikë.

Selia e kësaj shoqate, e cila është e vendosur në qytetin gjerman, Frankfurtit, i bëri thirrje ministrisë së Jashtme gjermane për të mbështetur kërkesën e tyre për vizitë tek Kolesnikova.

Përveç kësaj, ata kërkuan që babai dhe avokati i saj të lejoheshin ta vizitonin atë.

Ministrja e Jashtme gjermane, Annalena Baerbock, shkroi në Twitter se regjimi në Minsk duhet të garantojë shëndetin e opozitares bjelloruse dhe ta lirojë atë.

"Angazhimi i saj ndaj demokracisë nuk është krim" tha Baerbock.

Kolesnikova ishte një ndër drejtueset e protestave mbarëkombëtare kundër zgjedhjeve të diskutueshme presidenciale të vitit 2020, në të cilat presidenti Alexander Lukashenka e shpalli veten fitues.

SHIKONI EDHE: Udhëheqësja e opozitës thotë se fati i Bjellorusisë është i ndërthurur me atë të Ukrainës

Udhëheqësja e opozitës bjelloruse, e cila u detyrua të largohej nga vendi, Svyatlana Tsikhanouskaya, tha në shtator se Rusia nuk e sheh as Bjellorusinë e as Ukrainën si shtete të pavarura dhe sovrane.

Sipas saj, të dyja vendet duhet të luftojnë së bashku për të mbrojtur ekzistencën e tyre.

Lukashenka është një aleat i ngushtë i presidentit rus, Vladimir Putin, i cili e ka mbështetur pushtimin e paprovokuar të Ukrainës nga Moska.

Tsikhanouskaya tha deklaroi atëherë se Lukashenka duhej ta mbështeste Rusinë pas pushtimit të Ukrainës, sepse Putini e mbështeti atë pas protestave masive kundër pretendimit të tij për fitore në zgjedhjet e manipuluara të vitit 2020.

Vendet perëndimore e kanë dënuar Bjellorusinë, ashtu si Rusinë, me një listë gjithnjë e në rritje sanksionesh të ashpra financiare në përgjigje të luftës së Kremlinit kundër Ukrainës dhe për përpjekjet e Bjellorusisë për të ndihmuar pushtimin rus.