Në veri të Kosovës, më 27 dhjetor janë ngritur dy barrikada të reja. Një barrikadë është vendosur në Mitrovicë të Veriut, afër Lagjes së Boshnjakëve. Ndërkaq, barrikada tjetër është vendosur te vendi i njohur si Shkëmbi i Dudës (Dudin krsh), në Komunën e Zveçanit.
Barrikadat e reja përmes fotove
Barrikada e vendosur te vendi i quajtur Shkëmbi i Dudës (Dudin krsh). Kjo barrikadë ësthë vendosur në urën që lidh Mitrovicën e Veriut me rrugën kryesore Prishtinë - Rashkë.
Barrikada e vendosur tek udhëkryqi i Shkollës Teknike në Mitrovicë të Veriut. Ky vend gjendet afër Lagjes së Boshnjakëve, ku jetojnë shqiptarë, serbë dhe boshnjakë.
Me vendosjen e barrikadës në Shkëmbim e Dudës (Dudin krsh) pamundësohet lëvizja nga Mitrovica e Jugut drejt Zveçanit, një nga katër komunat në veri, të banuara me shumicë serbe.
Policia e Kosovës tha se barrikadat e reja janë vendosur nga "persona apo grupe kriminale" që synojnë të bllokojnë edhe më tej lirinë e lëvizjes.
Deri më tani, disa serbë lokalë kanë vendosur barrikada në rrugët që çojnë drejt dy pikave kuftiare - Jarinjë dhe Bërnjak - që lidhin Kosovën dhe Serbinë.
Barrikada e vendosur afër Shkollës Teknike.
Në Mitrovicë të Veriut, ku më 27 dhjetor u vendosën barrikadat, ka prani të pjesëtarëve të Policisë së Kosovës.
Rruga afër Lagjes së Boshnjakëve në Mitrovicë të Veriut është bllokuar me mjete të rënda.
Barrikada e vendosur afër Lagjes së Boshnjakëve, është barrikada e vetme që deri më tani është vendosur në një qytet në veri të Kosovës, teksa serbët lokalë, që nga 10 dhjetori, përmes barrikadave, po kundërshtojnë arrestimin e një ish-polici serb.
Serbët kanë kërkuar lirimin e ish-policit, Dejan Pantiq, dhe kanë paraqitur disa kushte të tjera për heqjen e barrikadave. Qeveria e Kosovës ka thënë se Pantiq dyshohet për sulmin e 6 dhjetorit ndaj zyrtarëve të Komisionit Qendror të Zgjedhjeve në veri. Qeveria ka thënë se po pret që KFOR-i të veprojë për heqjen e barrikadave.