Misioni vëzhgues i OSBE/ODIHR balotazhin e së dielës e ka vlerësuar kryesisht demokratik, por me disa parregullsi të regjistruara në disa qendra të votimit si presione ndaj votuesve, tentime për blerje të votës, votimi familjar e parregullsi tjera më të vogla. Përkundër kësaj, dita e zgjedhjeve sipas misionit vëzhgues është menaxhuar mirë, kurse publikimi i rezultateve ka qenë efikas dhe në mënyrë transparente.
Ambasadorja e OSBE-ODIHR, Auderey Glover, tha se në disa komuna janë vërejtur tensione jashtë vendvotimeve për shkak të prezencës së aktivistëve partiakë, të cilët në disa raste ushtruan presion mbi votuesve.
“Në këto zgjedhje kemi evidentuar raste të blerjes së votave, fotografim të fletëve të votimit duke mos përjashtuar edhe votimin familjar. E kemi vërtetuar këtë në disa vende dhe sigurisht Policia është duke i proceduar këto raste. Sa i përket pretendimeve për dhunë, raste të tilla nuk kemi vërejtur. Ne kemi parë fotografi të tilla, por në ato nuk ka asgjë të qartë për ne që të konstatojmë dhunën. Megjithatë ne nuk jemi polici zgjedhore. U takon partive që të denoncojnë këto akte me prova në institucione”, ka deklaruar Glover.
Sa i përket rolit të KSHZ-së, ambasadorja Glover tha se institucioni më i lartë në vend për mbarëvajtjen e procesit zgjedhor ka përmirësuar transparencën ndërmjet dy rretheve zgjedhore, por edhe këtu kishte vërejtje para se gjithash për mos përditësimin e listës, si pasojë e së cilës disa votues të moshës 18 vjeçare dhe 900 të burgosur mbetën jashtë listës zgjedhore.
Sipas OSBE/ODIHR, zgjedhjet lokale kanë qenë konkurruese kurse respektimi i lirive themelore ka kontribuar për zbatimin e zgjedhjeve demokratike.
Vlerësimet për rrethin e dytë zgjedhor ka dhënë edhe asociacioni qytetar “Most” që kishte numrin më të madh të votuesve. Zgjedhjet sipas Most-it, kanë kaluar në atmosferë të qetë dhe demokratike ku qytetarët lirshëm kanë mundur ta shprehin vullnetin e tyre zgjedhor.
“Edhe kësaj radhe ishim dëshmitarë të ndërhyrjes së shpejtë dhe efikase të institucioneve në ditën e zgjedhjeve ndaj parregullsive brenda dhe jashtë qendrave të votimit. Në këtë rreth u eliminuan problemet teknike gjatë realizimit të votimit që ishin vërejtur në rrethin e parë”, ka deklaruar Darko Aleksov, drejtor i Most-it.
Ndryshe nga kjo Most, shoqata tjetër që vëzhgoi zgjedhjet “Civil”, ka kërkuar hetimin e të gjitha parregullsive, në veçanti të pretendimeve të liderit të opozitës, Nikolla Gruevskit për harxhimin e 20 milionë eurove nga partitë në pushtet për siç ka thënë blerjen e votave.
“Prokuroria duhet të iniciojë hetim edhe sipas informacionit të marrë për këtë akuzë duhet të hetohet se kush dhe me sa fonde ka disponuar ose ka tentuar të bëjë intervenim serioz në procesin zgjedhor”, ka deklaruar Xhabir Deralla nga “Civil”.