Sekretari amerikan i Shtetit, Antony Blinken, tha se “ende ka shumë punë” për të tejkaluar dallimet mes Izraelit dhe Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian – për kushtet e një marrëveshjeje të re armëpushimi dhe lirimin e pengjeve.
Këtë deklaratë kryediplomati amerikan e bëri pasi grupi radikal palestinez paraqiti disa kushte për një marrëveshje të tillë, të cilat bien ndesh me qëllimet e luftës që Izraeli ka vendosur.
Hamasi ka shpalosur një plan prej tri fazash, që do të zbatohej në një periudhë prej katër muajsh e gjysmë, duke çuar drejt fundit të luftës dhe lirimit të të gjitha pengjeve, në këmbim të lirimit të të burgosurve palestinezë, dhe përfundimin e luftës.
Izraeli ka vendosur si qëllim shkatërrimin e aftësive ushtarake dhe qeverisëse të Hamasit, por plani i prezantuar nga grupi radikal në mënyrë efektive do ta linte atë në pushtet në Gazë, dhe do t’i mundësonte që të rindërtonte aftësitë ushtarake.
Lexoni edhe këtë: Hamasi përgjigjet ndaj planit për armëpushim në GazëBlinken më 7 shkurt u takua në Izrael me kryeministrin izraelit, Benjamin Netanyahu, gjatë vizitës së tij të pestë në rajon, që kur shpërtheu lufta Izrael-Hamas më 7 tetor.
“Ka shumë punë për të bërë, por ne jemi shumë të përqendruar që ta përfundojmë këtë punë dhe me shpresë
Lufta mes Izraelit dhe Hamasit – që është konflikti më vdekjeprurës mes palëve në histori – nisi pasi Hamasi kreu sulm më 7 tetor në jug të Izraelit, duke vrarë afër 1.200 persona dhe duke rrëmbyer afër 250 të tjerë.
Izraeli u kundërpërgjigj me një ofensivë tokësore, ajrore dhe detare në Rripin e Gazës, shtëpi e 2.3 milionë palestinezëve. Sipas Ministrisë së Shëndetësisë në Gazën e udhëhequr nga Hamasi, deri më tani janë vrarë mbi 27.000 palestinezë. Kjo ministri nuk bën dallimin mes civilëve dhe luftëtarëve të vrarë, por ka thënë se shumica e viktimave ishin gra dhe fëmijë.